Eqqaaginnarneq isumatusaarnerluunniit: Asiulersut qalipaatigeqisut

Containeri naatitanik paarmanillu asiulersunik ulikkaartoq assilineqarsimavoq, nittartakkanilu attaveqatigiiffiusuni siammarneqarluni mamiasutsitsingaatsiarluni. Kalaallit Nunaanni Brugseni ilisimatitsivoq naatitat paarmallu iginneqarnissaat pisariaqartartoq.

Nuummi eqqaavissuarmi naatitat paarmallu issinnerani asiujartorput. Nerisassat tunineqarsinnaannginnamik iginneqaannarsimapput. - Leiff Josefsen
Nuummi eqqaavissuarmi naatitat paarmallu issinnerani asiujartorput. Nerisassat tunineqarsinnaannginnamik iginneqaannarsimapput. - Leiff Josefsen

Nuummi eqqaaveqarfimmi containeri ammaannartoq inissisimavoq. Containeri naatitanik paarmanillu qalipaatigissunik immerneqarsimavoq. Peberfrugtit aappallarissut, vindruuat Spaniameersut, melonit salatillu Danmarkimeersut.

Qalipaatigissulli illinnarsinnaagaluartut uku taamaanngillat. Naatitat paarmallu asiulersimapput.

- Naatitat paarmallu nassiunneqartut ilaanni tikittarput tuniniarneqarsinnaajunnaareerlutik. Taava igiinnartariaqartarpagut, Kalaallit Nunaanni Brugsenimi nioqqutissanut pisortaq, Randi Vestergaard Evaldsen Sermitsiaq.AG-mut oqarpoq.

Taanna ilisimatitsivoq naatitat paarmallu pisiarineqanngitsuuginnarlutik eqqaavissuarmut iginneqaannartarnerannut pissutaasut arlaqartut.

- Pingaartumik assartuinermi angallannermilu kinguaattoortoqartillugu, imaluunniit nioqqutissat assartorneqarnerminni paarineqarluarsimatinnagit, naatitat paarmallu tigusatta ilaat asiusimasinnaasarput. Nioqqutissammi taakku uumassuseqartuupput, nioqqutigineqarnerullu nalaani asiusinnaallutik iginneqartariaqalerlutillu. Pisiniat pitsaanerpaanik nioqqutissaqartinnissaat soqutigisaraarput, nioqqutissallu igiinnannginnissaat aamma soqutigisaralugu, nioqqutissalli asiulersimappata allatut iliorsinnaasanngilagut.

Umiarsuarmiit eqqaavissuarmut

Nuummi eqqaavilerisoqarfik ilisimatitsivoq naatitat paarmallu asiusimasut eqqaavissuarmukaatinneqartarnissaannut periarfissaq niuertarfiit arlallit atorluartaraat. Nioqqutissat containerimut iginneqartarput, nunguinnissamillu tungaanut uninngatinneqartarlutik. Niuertarfiit eqqaavissuarmukaatitsisarnerisa akulikissusaat assigiinneq ajorpoq.

- Naatitat paarmallu qanoq annertutigisisut eqqaavissuarmukaanneqartarnersut ilisimatitsissutigisinnaanngilarput, igitassat ataatsimoortunut eqqaavissuarmukaanneqartussanut nalunaarsortarnerat pissutigalugu. Kisitsisit maanna ilisimarpianngilagut, siunissamili tamakku ilisimanerulernissaat suliniutigaarput, Randi Vestergaard Evaldsen oqarpoq.

Nerisassanik eqqaannginnissaq

Brugsenimi nioqqutissanut pisortaq erseqqissaavoq nerisassanik eqqaaginnannginnissaq anguniarlugu suliniutit arlallit ingerlanneqartut saqqummiunneqangajalersullu. Nioqqutissat tunineqarnissaminnut nutaanngippallaangajalersut akikillisarlugit niuertarfiit maanna suliniuteqarluareerput.

- Brugseni Islandimiit naatitanik paarmanillu pisiortornerulernikuuvoq, assartuinerup sivikinnerunera pissutigalugu nioqqutissat pitsaanerusarmata igitagullu ikinnerulerlutik. Suliniaqatigiiffiit soorlu Nuummi Uumasut Ikinngutai naatitanik paarmanillu asiungajalersimasunik, uumasulli nerisinnaasaannik tunineqartarput. Suliniutit taama ittut suli ingerlappagut, nioqqutissallu igiinnarneqartarnissaat soqutigisarinngilluinnarparput, Brugsenimi nioqqutissanut pisortaq, Randi Vestergaard Evaldsen ilisimatitsivoq.

Powered by Labrador CMS