Eqimattat kalaallimik toqutsisimasutut eqqartuunneqanngitsut

Januaarimi 2017-imi angut 20-nik ukiulik Kalaallit Nunaanneersoq, peqqarniitsumik persuttagaalluni kapineqarlunilu Skagenimi inissimini toqunneqarpoq.

Tamatuma kingorna angutit sisamat tigusarineqarput, januaarimilu ukioq manna taakku tamarmik Hjørringimi eqqartuussivimmi toqutsisimasutut eqqartuunneqarput. Unnerluunneqartut pingasut ukiuni 12-ini paarnaarussassanngortinneqarput, sisamaallu eqqartuussiviup naliliinera naapertorlugu ulorianangaarami piffissaligaanngitsumik paarnaarunneqartussanngortinneqarpoq.

Ilimaginngisamik allanngortoq

Vestre Landsretip unnerluunneqartut tamaasa toqutsisutut unnerluussummi pisuutikkunnaarlugit aalajangermat, suliaq sisamanngormat ilimaginngisamik allanngorpoq. Angutit pingasut peqqarniitsumik nakuusersimasutut suli pisuutinneqarput.

Uissuumminartumik aalajangerneq januaarip 16-anni 2017-imi pisup ingerlanerata nalorninartortaqarneranik pissuteqarpoq.

Tassami suliami pineqartumi saassussinerit marloriarlutik pipput. Unnerluunneqartut pingasut nakuusernermi siullermi nalunaaqutaq 19.30 missaani pisumi peqataasimasut uppernarsarneqartoq, Vestre Landsretip nalilerpaa.

Akerlianik taakkunannga sisamaasunit ataaseq minutsit qulit missaat qaangiuttut 20-nik ukiullip inaaniilluni persuttaanermik nangitsisimanersoq nalunarpoq.

- Sorleq qanoq iliorsimanersoq nalunangaarmat, aamma pinerluffigineqartup toqqutigisaminik nakuuserfigineqarnera qanga pisimanersoq nalunangaarmat, eqqartuussiviup taakku arlaannaalluunniit toqutsisutut eqqartuukkusunngilai, unnerluussisoq Lasser Krister Svensson oqarpoq.

- Pisuussuteqartut qulit pisuunngitsup ataatsip eqqartuunneqarsinnaaneranit iperaarusunnerusoqartarneranik tunngaviuvoq. Tamanna unioqqutitsinerusoq oqartoqarsinnaavoq. Illuanik inuiaat inuit inatsisitigut illersugaanerannik pingaartitsisuunerannik takussutissaavoq, unnerluussisoq oqarpoq.

Pissut

Pinerluffigineqartup unnerluunneqartut ilaannut taamani 19-nik ukioqartumut ketaminimik tunniussisimanera nakuusernermut pissutaasoq, unnerluussisut suliap ingerlanerani oqaatiginikuuaat.

Ketamin ilaatigut uumasunik sinitsitsinermut atorneqartarpoq.

19-nik ukiullip ikiaroornartoq oqummeramiuk, ingerlaannaq niui nukillaarput. Unnerluussut naapertorlugu tamanna sakkortuumik akiniaanermik kinguneqarpoq.

Suliap ingerlanerani angutip ketaminitorsimasup toqunneqartup pillarneqarnissaa kissaatigisimanagu oqaatigaa. Taanna kisimiilluni pinngitsuutinneqarpoq. Oqaatigineqareersutut illoqarfiup eqqartuussiviani ukiuni 12-ni paarnaarussassanngortinneqaraluarpoq.

- Nuannerpoq, maanna 21-nik ukioqartup illersuisua, Søren Beckermann, eqqartuussinerup kingorna oqarpoq. Maanna iperagaasup qaammaterpassuarni tigummigallarneqarsimaneranut taarsiivigitinnissamut piumasaqarnialerpoq.

Nakuuserneq pillugu eqqartuussut utaqqigaat

Sisamanngornermi ualikkut iperagaalluni eqqartuussivik qimappaa. Illuanik pingasut allat suli paarnaarussaaqqapput. Pingasunngorpat peqqarniitsumik nakuusersimanermut eqqartuunneqarnissaat naatsorsuutigineqarpoq.