Eqaluk Høegh: Naammatsippunga!

Tasiilami nunallu sinnerani atornerluisarnerit pillugit Inatsisartut ullormi oqallisiginniffissaanni, politikerit Facebookimi kamattumik avoqqaarinnittoqartoq makipput.

Kinguaassiutitigut atornerluinernut tunngatillugu sumiginnaanerminni Inatsisartuniinnatik, Naalakkersuisuniinnatik imaluunniit kommunalbestyrelsimiinnatik eqqartuussisup saavaniinnissaminnut tulluarnerunertik, videomi tusaasinnaavaat. Appisaluussinerlu pissaanillit akornanneerpoq, tassa Kim Kielsenip naalakkersuisutut allattaanit Eqaluk Høeghimit. Maasi Pedersen Prussicimit ilisarisimaneqartoq peqatigalugu, unnuap ilarujussua atorlugu videomik immiussisimavoq.

- Naammatsippunga, atorfimminik soraarluni alloriarujussuarnermini, Eqaluk Høegh naatsumik aalajangersimasumik taama oqarpoq.

Sumiginnaanertik nassuerutigisariaqaraat

Taamaalilluni maanna isertitaqanngilaq, kisianni ajorunnarnani oqaatigaa – aamma namminerminut tunngannginnerarpaa.

- Politikerit Naalakkersuisuni, Inatsisartuni aamma kommunalbestyrelsini akisussaaffimmik tigusissapput.

- Sumiginnaanertik nassuerutigissavaat, aamma polikerit tulleriaarinerannik inatsisit malinneqarsinnaannginnerat.

- Assersuutigiinnarlugu politikkikkut pissaaneq pigisartik atorsinnaanagu folketingimut qineqqusaartariaqanngillat.

Inatsisartut 2017-imi meeqqat pillugit inatsimmik nutaamik akuersipput, kinguaassiutitigut atornerluisoqarneranik nalunaaruteqartoqarpat, kommunit 24 tiimit iluanni qisuariartarnissaannik pisussaaffiliisoq. Kisianni meeqqat amerlasuut atornerlugaasimasut tamanna misigineq ajorpaat.

- Inatsisit qanoq malinneqarnissaat pillugu politikerit pilersaarusiussapput, Eqaluk Høegh oqarpoq.

Kim Kielsenimut inuttut saqitsaateqatiginninnginninnini taassuma oqaatigaa, akerlianik Naalakkersuisut siulittaasuat suleqatigilluarsimanerarpaa. Politikkikkut tulleriiaarineq ajorluinnartoq, taanna isumaqarpoq.

- Naalakkersuisut qangali iliuuseqarsimasariaqaraluarput. Malinneqartussamik inatsiseqarpoq. Kommuneqarfik Sermersuup ajornartorsiut qangali nassuerutigereerpaa.

Piviusulersaarusiap 'Børn hvor børn forsvinder'-ip kinguaassiutitigut atornerluinerit sammineqarnerat politikkikkut oqallisigineqartuni siullinngorteqqippaa. Kisianni piviusumik piviusulersaarut paasissutissanik ilisimalluarneqareersuinnarnik saqqummiussivoq. Nakkutilliinernit nalunaarusiat, meeqqat illersuisuata angalanernit nalunaarusiai aamma atornerlugaanikut misigisaminnik oqaluttuarnerat uteqattaarneqartuarput. Kingullermik siorna politikerit qineqqusaarluni oqallittoqarnerani ajornartorsiutip iluarsineqarnissaanut ataatsimoorniarlutik neriorsuipput.

Inuiaqatigiinnik iliuuseqarusuttunik katersuiniartut

Eqaluk Høeghip aamma Maasi Pedersenip maanna politikerinit aaqqiissuteqartoqarnissaa tatigiunnaarpaat. Taarsiullugu inuiaqatigiit neriuuteqarfigaat.

- Inuit isumassarsiallit aamma iliuuseqarnissamut sapiissusillit katersussavagut, taakku oqarput.

- Iliuuseqartoqarsimasoq nalunngilarput, kisianni naammanngilaq.

- Ataatsimeersuarnermik kikkut tamarmik peqataaffigisinnaassaanik suliaqarsinnaanerput neriuutigaarput. Aalajangiisartut, isummersuisartut, inuit ataasiakkaat aamma suliffeqarfiit ikioqatigiissapput. Periutsip allanngortinniarnerani inuppassuit pisariaqartinneqarnerat pissutigalugu.