Eqaluk Høegh: Meeqqat pillugit iliuusissatut pilersaarut tukappoq

FN-ip Meeqqat Pisinnaatitaaffii pillugit Isumaqatigiissutaata eqquutsinnissaanut iliuusissatut pilersaarutip suliareqqinneqartariaqartoq IA-meersoq Eqaluk Høegh siunnersuuteqarpoq. Inuit innarluutillit illersuisuata taperserpaa. Pilersaarut aningaasaliiffigineqarsimanngitsoq ilaatigut isornartorsiutigineqarpoq.

FN-ip Meeqqat Pisinnaatitaaffii pillugit isumaqatigiissutaata eqquutsinnissaanut iliusissiatut pilersaarut suliareqqinneqartariaqartoq Eqaluk Høeghip kissaatigaa.

Kalaallit Nunaata Naalagaaffiit Peqatigiit Meeqqat Pisinnaatitaaffii pillugit Isumaqatigiissutaata eqquutsinnissaanut Naalakkersuisut aallaqqaataaniit suliaqartariaqarput.

Politikkeri Eqaluk Høegh (IA) Inatsisartunut siunnersuusiortoq taama isumaqarpoq.
Isumaqatigiissutip malinneqarnissaanut Naalakkersuisut siorna ukiakkut pilersaarummik 2023-miit 2030-mut atuuttussamik saqqummiipput. Taannali suleqatinik pingaarnerpaanik peqataatitsiviunngitsoq, soorlu kommunalbestyrelsinik Inatsisartullu ilaqutariinnut peqqissutsimullu ataatsimiititaliaanik, Høegh isumaqarpoq.
Meeqqat Illersuisuata peqataatinneqarsimannginnertik aamma maalaarutigaa.
Taamaammat Eqaluk Høegh ima inerniliivoq:

- Allatut oqaatigalugu qitiusumit iliuutsit kisiisa aallaavigalugit pilersaarut suliarineqarsimavoq. Tamannalu isumaqarpunga kukkunerusoq annertooq.

Tiliup aningaasaliisoqannginnera isornartorsiutigaa

Inuit Innarluutillit oqaaseqartartuata Tiliumiit isornartorsiut isumaqatigalugu nalunaarutigaa, isumaqatigiissullu meeqqanut innarluutilinnut aamma atuuttoq ilanngullugu eqqaasitsissutigalugu.
Suut suliniutit ”pilersinneqassanersut, ineriartorteqqinneqassanersut, atuutilissanersut, aningaasaliiffigineqassanersut iliusissatut pilersaarummi uani nalunaarsorneqassanersut” Tiliup erseqqissaqquaa.

- Iliusissatut pilersaarummi qanoq aningaasaliisoqassanera eqqaaneqannginnera ernummatigaarput. Iliusissanut aalajangersimasunut aningaasiliisoqareersimatinnagu atuutsinneqalerniarnerat puiorneqartarnerat imaluunniit annikillisinneqartarnerat Tiliumiit misigisarparput, inuit innarluutillit illersuisuat Anja Hynne Nielsen oqarpoq.

Naalakkersuisut "nutarterinissaq" siunnersuutigaat

Meeqqanut, inuusuttunut ilaqutariinnullu naalakkersuisup Mimi Karlsenip (IA) akissuteqaateqarnermini erseqqissaatigaa kommunini isumaginnittoqarfiisa Meeqqallu illersuisuata nalunaarusiaat Naalagaaffiit Peqatigiit Meeqqat Pisinnaatitaaffii pillugit Isumaqatigiissutaata eqquutsinnissaanut iliusissamik pilersaarusiornermi ilanngunneqarsimasut.

Amerlanerusunilli peqataatitsisoqarsinnaanerarlugu:

- Iliuusissatut pilersaarutini ingerlanneqartuni suliniuteqartoqaraluartoq peqataatitsinermullu sulisoqaraluartoq annertunerusumik peqataatitsisoqarnerusariaqartoq siunnersuummi erseqqissarneqarpoq.

Naalagaaffiit Peqatigiit Meeqqat Pisinnaatitaaffii pillugit Isumaqatigiissutaata malinneqarnissaanut iliuusissatut pilersaarummik ”nutartikkamik” kingusinnerpaamik maajip aallaqqaataani 2024-mi piareerneqartussamik Eqaluk Høeghip siunnersuutaanut allannguutissatut siunnersuuteqarpoq.

Immikkut annertusisamik iliuuseqartoqaqqusisoq

Taassuma saniatigut Eqaluk Høeghip Naalakkersuisut kommunillu ”meeqqat inuusuttullu kommunini tamani suliassanngortitat annertuumik navianartorsiortutut nalunaarsorneqarsimallutik inissisimasut kiisalu meeqqat inuusuttullu pillugit suliat suliarineqarsimanngitsut immikkut annertusisamik iliuuseqarfiginissaannik” siunnersuuteqarpoq.

Immikkut iliuuseqartoqarnissaanut atatillugu taamaattoqareersoq naalakkersuisoq isumaqarpoq.

Siunnersuutit uani sapaatip akunnerani siullermeerneqarmata ataatsimiititaliamut ingerlateqqinneqarput.

Powered by Labrador CMS