Eqaluk Høegh Naalakkersuisutut tunuarpoq
Qinersinermi taaguunneqarluarsimasoq Eqaluk Høegh stressernini pissutigalugu naalakkersuisutut tunuarniarluni aalajangersimavoq. Tamatumunngalu peqatigitillugu napparsimagami Inatsisartunit sulinngiffeqarnissani qinnutigisimallugu.
Meeqqanut, Inuusuttunut, Ilaqutariinnut Inatsisinillu Atuutsitsinermut Nalakkersuisoqarfittut pilersinneqaqqammersumi, qaammatini sisamaannarni Múte B. Egedep naalakkersuisuutitaasa inuusunnersaattut naalakkersuisooreerluni tunuarniarluni aalajangersimavoq.
Eqaluk Høegh, apriilimi qinersisoqarmat IA-mi qinigaanerpaat sisamaattut 649-nik taaguunneqarsimasoq stressernini pissutigalugu Naalakkersuisutut tunuarniarluni aalajangersimavoq. Eqaluk Høegh Facebookikkut taamatut allassimavoq.
Taamaammat Múte B. Egedep qinnuteqaat akuerisimassagaa ilimagineqartariaqarpoq, maannalu meeqqat inuusuttullu nunami maani atugaannik pitsanngorsaaniarluni akisussaaffimmut oqimaattumut nutaamik inuttassarsiuisariaqarluni.
Eqaluk Høeghip Sermitsiaq.AG-mut ilisimatitsissutigaa, Inatsisartunut ilisimatitsissutigisimallugu Naalakkersuisutut atuuffeqarnermini Inatsisartunit sulinngiffeqarnini tunuartillugu, ukiorli manna decembarip 31-ata tungaanut Inatsisartunit sulinngiffeqarnissani aamma qinngutigisimanerarpaa.
Har været undervejs længe
Eqaluk Høegh Facebookikkut ilisimatitsivoq, maanna peqqissutsikkut inissisimanera Naalakkersuisutut akisussaaffeqarnermut naapertuutinngitsoq, imminullu peqqissutsinilu maanna ukkatariniarlugu oqaatigalugu.
Qinersisoqarneranit qaammatialuinnguit qaangiutiinnartut stressilersimavoq. Juunip qaammataani saqqummiunneqarpoq, Eqaluk Høegh Naalakkersuisutut ivertinneqarnermi kingorna stressilersimasoq, juulillu 18-ani inatsisinik atuutsitsinermut atatillugu suliassaqarfik Naaja Nathanielsenip suliassaqarfianut ilanngunneqarpoq. Aggustip arfernani ataavartumik suliassaqarfigilerlugu.
Eqaluk Høeghip taamanikkut Sermitsiaq.AG-mut oqaluttuaraa, Naalakkersuisut Siulittaasuat isumasioreerlugu stressernermi siunnersorteqalersimalluni, tamakkiisumillu suleqqilernissaminut piariingajalerluni.
Tamannali pisimanngilaq, Eqaluk Høeghilu maanna naalakkersuisutut tunuarluni.
Angusaqarluartussatut naatsorsuutigineqarsimasoq
Eqaluk Høeghip meeqqat atugaat oqaluuseritilernikuuaa, taamanikkut 2019-imi maajip qaammataani naalakkersuisuusut isornartorsiorlugit Facebookikkut videomik saqqummiussigami tapersersorneqarsimaqaaq.
Eqaluk Høeghip taamanikkut Naalakkersuisut Siulittaasuannut Kim Kielsenimut allatsitsut atorfini qimakkamiuk video saqqummiussimavaa.
Eqaluk Høgh politikkikkut suliat iluaniit takusimavai, kakkaginagillu. Taamanikkut erseqqissaassutigaa, politikkerit meeqqanik inuusuttunillu atugarliortunik ikiorsiiniarlutik iliuuseqarnerusariaqartut, sukkanerusumillu iliuuseqartariaqartut.
Taamaammat Múte B. Egedep inuusuttunut tv-kkut aallakaatitsisartutut, oqallissaarisartutut pissutsinillu isornartorsiuisartutut ilisimaneqartoq susassaqarfimmut akisussaaffilermagu qinersisartorpassuarnit nuannarineqarsimavoq.
Naalakkersuisoqarfik nutaaq suliassarpassualik
Tamatuma kingorna politikkerip nipituuliorsinnaasup suliassaqarfini pillugu nipaappallaarnera inuppassuarnit tupigusuutigineqarsimavoq. Ilaatigut Demokraatineersup Anna Wangenheimip arlaleriarluni Eqaluk Høeghip iliuuseqarnissaa ujartortarsimavaa. Kingullmerik sisamanngormat Facebookikkut videomik saqqummiussinermigut.
Naalakkersuisoqarfimmili suliassanik kivitsinissaq naalakkersuisussamut nutaamut oqittuinnaanavianngilaq. Eqalu Høeghip kingullermik nalunaarutigaa, pitsanngorsaanissamut aaqqiissutissaasinnaasunik tikkuussiniarluni susassaqarfimmi paasissutissat misilittakkallu amigaataasut.
Tamatumunnga peqatigitillugu naalakkersuisoqarfimmi maanna pisortaasoq Julie Præst Wilche allami suliffeqalerniarluni aalajangersimavoq, taamalu ilisimasat misilittakkallu Eqaluk Høegh peqatigalugu Naalakkersuisoqarfimmi pigineqarunnaassallutik.