Eqaavissuup ikuallannera Avannaata Kommuniata akisunaaraa

Ilulissani eqqaavissuaq maajimi ikuallammat atortut pisariaqartinneqartut ikuallallutik peerussimaspput, kommunilu maanna eqqagassalerinermi annertuumik tatineqarluni. Taamaammat kommuni atortussanik nutaanik pisiaqartariaqarpoq.

Ilulissani eqqaavissuaq maajimi ikuallammat, kommunip atortussanik suliaqarnermut maskiinaa sequtserutaalu, eqqakkanik suliaqarnermut atorneqartartut ikuallallutik peerupput.

Ilulissani eqqaavimmi eqqakkanik suliaqarnerit tamarmik maannakkut assassorfigalugit imaluunniit suliffeqarfiutilimmit attartugaqarnikkut, tassalu suliffeqarfiutillit taakku tamatumunnga piffissaqaraangata ingerlanneqartarnerannik tamanna kinguneqarpoq, kommunalbestyrelsip ataatsimiinneranit imaqarniliami allassimavoq.

Taarsiinissaq pisariaqartinneqartoq

- Eqqaavilerinermik suliassaqarfimmi artukkiissutaasup malittariniarnera pisinnaanngingajavissoq kommunimut nassataritinneqarpoq, maannakkullu sulisuusunut taakkununnga, assatik atorlugit suliamik annertuumik suliaqartussaasunut nalinginnaanngilluinnartumik annertuumik artukkiisoqarpoq, ilisimatitsissutigineqaarpoq.

Taarsiinissamut pisariaqartitsineq maannakkorpiaq pisariaqarsimavoq, pissutsit eqqartorneqartut pissutigalugit, aammattaarli aasap nalaani Ilulissani eqqaavissuarmut Upernavimmit Uummannamiillu eqqakkanik takkuttoqartussaammat.

Sanaartornermut konto

Taakkununnga qalliisumik ikuallaasarfimmi kissarsuut iluarsaanneqartussaasimavoq, tamannalu eqqaavilerinermik suliaqarfiusumut eqqakkanillu isumaginninnermut tamanna suli annermik artukkiisimavoq.

- Qaasuitsup Kommunianit pisiarineqarsimasut sequtserut atortussanillu isumaginninnermut maskiina ikuallannermi peeruttut sillimmasiissutikkut matussusersimanissaat naatsorsuutigineqarsimavoq. Taamaattorli taamaattoqarsimanngitsoq paasineqarpoq, taamaattumillu atortussanik nutaanik taakkuninnga pisiaqarneq sillimmasiinerup matussusinngilai.

Kommuni taamaammat aningaasartuuteqartariaqarpoq. Atortussat nutaat 6,7 millioner koruunit sinnerlugit akeqatussaapput. Aalajangiunneqarpoq, ilaatigut kommunip sanaartornermut suliassaqarfianit aningaasat pissarsiarineqassasut.

Aamma atortussanik pisiaqarnermi aningaasartuutit matussuserniarlugit IT pillugu suliaqarfimmit kiisalu 'Kommunip inuussutissarsiutinut suliaqarfianit' aningaasanik nuussisoqassaaq.

Powered by Labrador CMS