Skip to main content

EPI Naalakkersuisunit tapersersorneqarnissartik piumasaqaatigaat

Eqqumiitsuliortut soqutigisaat pillugit Naalakkersuisut akornusersuipput naqisimannillutillu. Tamanna unitsinneqartariaqarpoq, EPI-mit oqaatigineqarpoq

Eqqumiitsuliornikkut Pinngorartitsisut Ingerlatsisullu kattuffiata EPI-p Kalaallit Nunaanni eqqumiitsuliortut Naalakkersuisunit piluarineqartutut misigisimavoq. Politikkerit eqqumiitsuliortunut tapersersuisuunngitsutut oqaatigaat. 

EPI 2010-mi maajimi aallartinnitsinneraniilli anguniagaraa ilaasortat atugarisamikkut sutigut tamatigut oqilisaaffigineqalernissaannik suliniuteqarnissaq. 

- Anguniakkatta tusaqqusaarutigilerneranniilli piumasarilerparput pissutsit qangaaniilli taamaaginnartut taamaakkallartillugit pisortaqarfimmiit siunnersorneqartarnitta pitsanngorsaaviginissaa, angusimalerparpummi pilluta pisortaqarfimmi susoqartillugu minnerpaamik tusarniaaffittut inissisimalernerput. Tusarniaaffittut inissinneqarnerput iluarigaluaqigipput pisortaqarfimmit oqaatsit iliuutsillu ingiaqatigiittannginnerisa kinguneraat akissuteqaatitta ilanngunneqanngisaannarneri, tassalu pisortaqarfimmi atorfilinnit akissutigisatta isiginngitsuusaarneqartuarneri, EPI-p siulittaasua Leif Saandvig Immanuelsen ukiortaami oqaaseqaammini allappoq. 

Anguniagaqartuaannarnissaq
- Naalakkersuisut nikineranni naalakkersuisut ataasiakkaat pilersaarummik saqqummiussaqartarput, taamaaliorportaaq naalakkersuisoq eqqumiitsuliortunut susassaqartoq, taamaattorli pilersaarut marloriarlugu naalakkersuisooqatigiit itigartissimagaat tupaallaatigeqalugu tusarparput, EPI-p siulittaasua oqarpoq. 

Pitsaanerusumik atugaqalernissartik tungaanut suliartik sukataarunniarlugu oqarpoq. 

- Pisinnaatitaaffeqartitaanerpulli, soorlu aamma FN-ip ataani nunat inoqqaavisa pisinnaatitaaffii eqqarsaatigalugit, atukkatta naalakkersuisunit iliuuseqarfigineqarnissaannik piumasaqaatitta iliuuseqarfigineqarnissaat nipituumik tusaqqusaarutigineri nangissavarput.

Eqqumiitsuliortut inatsisaat
Eqqumiitsuliornikkut Pinngorartitsisut Ingerlatsisullu isumaqarput pissutsit taamaaginnalersimasut allanngortinniassagaanni pineqartut pillugit inatsisit atorunnaarseriarlugit nutaamik aaqqissuusseqqinneq pisariaqartoq. Inatsit tunngaviuniartoq sunngiffik pillugu peqqussutaavoq kingullermik 2004-imi Inatsisartunit allannguuteqalaartinneqalaartoq. 

- Taannarpiaavorlu ineriartortitsinissatsinnik kinguarsaasoq pinngitsoortitsisorlu. Taamaattuminguna EPI-mit tusaqqusaarutigigipput Eqqumiitsuliorneq pillugu inatsiseqalernissaanik, kiisalu Eqqumiitsuliorneq pillugu aningaasaateqarfiliortoqarnissaanik. Tamakkuli anguneqassappata nutaamik aaqqissuusseqqinneq pisariaqarluinnarpoq, assersuutigalugu Isiginnaartitsinermik inatsit atorunnaarsillugu nutaamik aaqqissuuteqqinneqartariaqarpoq inunnut ikittuinnarnut suliffissatut pinnagu inunnulli isiginnaartisinermik suliaqartunut tamanut ammaanneqarnissaa qulaakkeertillugu. 

Isiginnaartitsinermik inatsit atorunnaarsillugu nutaamik aaqqissuuteqqinneqartariaqartoq siunnersuuteqarput.

-  Inunnut ikittuinnarnut suliffissatut pinnagu inunnulli isiginnaartisinermik suliaqartunut tamanut ammaanneqarnissaa qulaakkeertillugu. Assersuutinut ilaasinnaavoq aningaasaateqarfiit qinnuteqarfigineqarsinaasut ullumikkut suli politikerinit akuleruffigineqarsimasut susassaqartunit aqunneqalernissaannik oqariartuutigisartagarput, Leiff Saandvig Immanuelsen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER