Hans Enoksen: Kim Kielsen Inatsisinut Ataatsimiititaliamit misissuiffigineqassaaq
Suliamut attuumassuteqarpallaarnerarneqarneq aamma imminut ilunaartinniarluni pissaanermik atornerluinerarneqarneq Kim Kielsenip sapaatip akunnerani kingullermi misigisimavaa. Siulittaasup pasilliutigineqartut tamaasa ippassaq unnukkut tv-kkut itigartippa, Partii Nalerarli qularunaarsimanngilaq.
- Naalakkersuisut Siulittaasuata pingasunngornermi juunip pingajuani Qanoroomi oqaaseqaatai uissuummititsipput.
Partii Naleqqami siulittaasoq Hans Enoksen sisamanngormat tusagassiorfinnut nalunaaruteqarnermi taamatut allappoq.
Naalakkersuisut Siulittaasuata Kim Kielsenip pingasunngormat Qanoruumi tunngavissaqannginnerarpaa, angallatimi attartortinneqarneranut nipisattassiissutinillu qaffaasimanermut tunngatillugit suliamut attuumassuteqarpallaarneq pillugu apeqqutip ilanngunneqarnissaa.
Tamannali suli isumaqatigineqanngilaq. Partii Naleqqamit saqqummiunneqarpoq Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq, tassani ilaatigut allassimavoq:
Kapitali 2.
Suliami peqataasinnaannginneq
§ 3. Kinaluunniit pisortatigut ingerlatsinermi suliaqartoq suliassami aalajangersimasumi peqataasinnaanngilaq,
1) nammineq imminut eqqarsaatigaluni aningaasalluunniit eqqarsaatigalugit suliap qanoq inerneqarnissaanik soqutiginnilluinnartuuguni imaluunniit siusinnerusukkut suliami tassani kimulluunniit taamatut soqutiginnittumut sinniisuusimaguni,
2) taassuma aapparisaa, eqqarlia imaluunniit aappariinnnikkut siulimigut kinguaamigulluunniit siulimiluunniit qatanngutaasigut imaluunniit allatigut qanitaasigut qanitsigisumik qanigisarinnittuusoq imminut eqqarsaatigaluni aningaasalluunniit eqqarsaatigalugit suliap qanoq inerneqarnissaanik soqutiginnittuuppat imaluunniit kimut taamatut soqutiginnittumut sinniisuuppat.
Kim Kielsen oqarpoq, angallat attartortitani nipisanniarnermut atornani allanik aalisarnermut atorneqarsinnaammat, nipisanniarnermut sukkulluunniit soqutiginnissimanani.
Hans Enoksenili isumaqarpoq, siulittaasoq nipisattassiissutit qaffanneqarnissaanik Naalakkersuisut suliaqarmata peqataasimasariaqanngikkaluartoq.
- Naalakkesuisut Siulittaasuata Naalakkersuisut 2020-mi maajip aqqanq-appaanni ataatsimiinnerannut peqataanermigut, Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq unioqqutippaa, taanna allappoq.
Inatsimmi qulaani pineqartumi aamma allassimasoqarpoq:
5) Imm. 3. Suliassami pissuteqartumik peqataasinnaanngitsoq suliassap suliarineqarnerani aalajangiissanngilaq, aalajangiinermi peqataassanngilaq allatulluunnit peqataassaanngilaq.
Oqallinnermili attuumassuteqarpallaartoqarsimanersoq suli sammineqarpoq, Hans Enoksenillu tamanna inatsisinut ataatsimiititaliamut misissortikkusuppaa.
- Naalakkersuisut Siulittaasuata oqaaseqaatai tunngavigalugit isumaqarpunga, pisoq Inatsisartut Kukkunersiuinermut Ataatsimiititaliaanit aamma Inatsisinut Ataatsimiititaliaanit piaartumik misissorneqartariaqartoq, Enoksen naggasiilluni oqarpoq.