Enoksen: Kielsen eqqunngitsumik oqaluppoq
Timersorluni Nunatsinni pissartanngorniuttoqartariaqartoq Partii Naleqqap siulittaasua Hans Enoksen isumaqarpoq.
- Naalakkersuisut siulittaasuat eqqunngitsumik oqaluppoq. Timersuutini Nunatsinni pissartanngorniuullutik unammersuarnissaannut tunngasut Partiit siuttuini ataatsimoortumik isummerfigineqarnikuunngillat.
Hans Enoksen tusagassiutinut nalunaarummi allappoq.
Katersuunnissamut inerteqquteqarneq 2021-mi januaarip 31-ata tungaanut sivitsorneqarnera pissutaalluni unammersuaarnissat ukioq manna taamaatinneqarput, tusagassiortunik katersortitsinermi sapaatip akunnerata siuliani avammut nalunaarutigineqarluni.
Unammersuaartoqarnissaa Hans Enoksenimit maanna sukataarutigineqarpoq.
- Avataaniit tikerartunut tamakkiisumik aammassisimagaanni aamma nunatta coronarfiunngitsup iluani tamakkiisumik ammaassisimasariqarpoq. Kingusinaartoqartinnagu aaqqiigasuarniarta, oqarpoq.