uran pillugu oqallinneq
Hans Enoksenip uran pillugu oqaatsini aalajangiusimavaa
Siornatigut Siumut siulittaasua Hans Enoksen uranisiornissamut suli akerliuvoq
Hans Enoksen Siumumeersoq uranimut naaggaarluinnarsimanerup atorunnaarsinnissaanut taaseqataaniarpoq inatsisartut sisamanngornermi oqallisigilerpassuk.
- Siumup Nunatsinni uranisiorneq akuerinngilaa akuersaanngisaannassallugulu.
Hans Enoksen april 2009-mi Siumumi siulittaasuutilluni tusagassiutinut nalunaarummini taama allappoq. Maanna Sermitsiaq.AG-mut oqaluttuaraa isummani allanngorsimanngitsoq.
- Siumup uranisiorne akerleraa aamma uanga Nunatsinni uranisiornissaq akuersaarnavianngilara, uranimut naaggaarluinnarnerup Inatsisartuni oqaluuserineqarnissaanut aqaguttoq Hans Enoksen oqarpoq.
Aatsitassanut Naalakkersuisup Jens-Erik Kirkegaardip aalajangiiffigisassatut siunnersuut sisamanngornermi saqqummiutissavaa uranimut naaggaarluinnarsimanerup atorunnaarsinneqarnissaanut tunngasoq taannalu oktoberip 24-ani aappassaanneerlugu suliarineqassaaq.
- Siunnersuummi pineqarpoq uranitalinnik aatsitassarsiorsinnaanissap ammaannissaa. Kisianni toqqaannartumik uranisiornissaq pineqanngilaq, Hans Enoksen oqarpoq.
Uran-imi isumannaatsumik qanoq pineqassava?
- Inatsisartuni ilaasortat teknikeriunngillat. Misissuinerit sukumiisut pissapput. Aamma uranitalinnik aatsitassarsiornissaq akuerineqarnavianngilaq innuttaasut peqqinnissusaannut avatangiisinullu ulorianaateqassappat, Hans Enoksen oqarpoq.