maleruagassat
Enoksenip Royal Greenland saassuppaa
Aalisarnermut Piniarnermullu Naalakkersuisoq Hans Enoksen pisortat suliffeqarfiutaat Royal Greenland kilisaatini inuttalersuisarnerat apeqquserpaa
Kilisaatini kalaallit nunaqavissut amerlanerusut inuttarineqartalernissaat sulissutiginiarlugu Svend C tallimanngormat tallimanngormat kingullermik Nuummut tikittoq piginnittui Hans Enoksenip erseqqissarpai, tamanna pingasunngormat tusagassiuutinut nalunaarutigaa.
Atuaruk: GE: Enoksenip sukateriniarnera aaqqiissutissaanngilaq
Svend C-mik piginnittut, Sikuaq Trawl, kilisaataatileqatigiinnut allanut maligassiuinerat, soorlu Royal Greenlandimut sunniuttariaqarpoq. Kilisaassuarmik piginnittut erseqqissaaffigivaannga amerlanerpaamik kalaallinik aalisartoqaraluarlutik aqumioqaraluarlutilluunniit ajornartorsiuteqartaratik. Hans Enoksen tusagassiuutinut nalunaarummini taama oqarpoq.
Atuaruk: Enoksenip inuttaqarnermut inatsisit sukaterniarpai
- Sooruna kilisaatit pisortanit pigineqartut tamanna malissinnaanngikkaat, Hans Enoksen aperivoq.
- Nunatsinni kilisaataatillit, ingammik Royal Greenland, aalisartunik aqumiunillu pikkorissunik amigaateqartuarpata, taava nunatsinni imarsiornermik ilinniarfiit pineqartut ilinniagaannik annertusaasariaqarput, aalisartut aqumiullu nunanit allaneersut inuttaasarnerat siunissami killilertariaqarluni, Hans Enoksen oqarpoq. Ajornatorsiutilli aaqqiivigineqarnissaanut Ilinniartitaanermut Naalakkersuisumut Doris Jakobsen-imut attuumassuteqartoq nassuiaateqarfiginagu.
Royal Greenland oqaaseqarpoq
Royal Greenlandip Enoksenip oqaaseqaataa naatsuaqqamik Sermitsiaq.AG-mut oqaaseqarfigaa.
Royal Greenlandip kilisaataanik pisortaq Jens Bisgaard oqarpoq:
- Royal Greenlandip inuttaqarnermit inatsisit atuuttut tamakkiisumik malippai, tusagassiuitinut nalunaarummut tunngasumik allamik oqaaseqassanngilagut.