Hans Enoksenip Martha saassukkaa: 30-nik issittumi kissarsuut uuliatortoq orsussaqanngitsoq
Nunatta avataanit suliartortunut pingaartitanik oqallinnermi Siumut nutaanik piumasaqaateqarluni saqqummiussivoq. Illuatungiliuttulli allanut tunngasunik aamma oqallinnissaq ilungersuutigaat, soorlu nunami maani innuttaasunut inuuniarnikkut atugassarititaasut ilungersunartut.
Innuttaasut 20 procentii piitsuungaatsiarput.
Nunatta Naatsorsueqqissaartarfianit nalunaarsukkat tamanna takutippaat, tamatumunngalu atatillugu nunami maani naligiinnginnerujussuaq nassuiarneqarluni. Tassami taamaalilluni maanna inuit isertitaqarluartuneersut, ilaqutariinnut isertitakinnerpaanut naleqqiullugit tallimariaammik isertitaqarnerupput. Nunarput taamaalilluni Nunani Avannarlerni innuttaminut assigiinnginnerpaanik atugassaqartitsivoq, AG allappoq.
Oqallinneq
Naalakkersuisuni isumaginninnermut tunngasunut akisussaasup, Martha Abelsenip (S) Inatsisartuni qanittukkut apeqqarissaarfigineqarnerani pissutsit ajornartoornermut eqqaanartut pissusissamisoortumik qitiutinneqarput.
Tamatumani ullutsinni pingaartitat Siumup piffissami kingullermi saqqummiussai – tamatumani ilanngullugit piumasaqaatit nutaat oqaatsinut tunngasut aamma nunanit allaneersut taasisinnaatitaanerannut tunngasut – tunulliukkallarneqarlutik nunami namminermi innuttaasut inuuniarnermikkut atugaat oqallisigineqarput.
Hans Enoksen, Partii Naleqqap siulittaasua, kamattorujussuuvoq.
– Isumaginninnermi ikiorsiissutit taama ikitsigimmata ajorluinnarpoq. Assersuutigalugu tusartarpavut, silami 30-nik issittumi illup kiassarnissaanut qinnuteqaraluarluni pissarsisoqarsinnaasanngitsoq. Aningaasanik atorniaraluarluni aamma itigartitaasoqartarpoq. Tamatumani aamma atuulluni kommunimut nerisassarsinissamut imaluunniit umiatsiaaqqamut orsussamik ikiorserneqarnissamut qinnuteqaraluaraanni. Taava innuttasut paasitinneqartarput qinnuteqaataat ingerlateqqinneqassasoq, qitiusumillu suliarineqassasoq. Innuttaasoq taamaalilluni ulluni qulini utaqqisariaqartarpoq, Hans Enoksen taama nipituuliorpoq.
Martha Abelsenip oqaatigaa, malittarisassat Inatsisartunit amerlanerussuteqartunit akuersissutigineqarsimasut naapertorlugit sulisoqartartoq.
Sullissineq pitsaanerusoq
- Malittarisassat taakku uniorlugit pisortanit ikiorsiissutinik agguaasoqarsinnaanngilaq, taanna akivoq; tamannali Hans Enoksenip saammarsaatiginngilaa.
- Ombudsmandip nalunaarusiaa aamma atuarparput, tamatumani takusassiarineqarluni pisortat innuttaasunut isumassugassanut qanoq sumiginnaatigisarnerat. Sullissinersi pitsanngorsartariaqarparsi!
Allaaserineqartoq aviisimi AG-mi tamakkiisumik atuarneqarsinnaavoq. Aviisi uani pisiariuk: