Enoksenip Kujataani aalisartut kattullutik aalisaqquvai

Kujataani sinerissap qanittuani aalisarneq ukiuni kingullerni unittoorluinnangajaqqavoq. Aalisariutillu allaneersut imartami aalisartuullutik.

Tamakkuupput Aalisarnermut Piniarnermullu Naalakkersuisup, Hans Enoksenip (PN) Kujataani tikeraarnermini paasisai.

Najukkami piginneqatigiiffik aalisariummik avataasiorsinnaasumik pisissaaq

Hans Enoksen (PN) isumaqarpoq najukkami aalisartut avataasiornermi pissarseqataasariaqartut.

- Aalisartut misigisimapput aalisariutinut allaneersunut imartaminni aalisartunut isiginnaartuuginnarlutik. Taamaattumik kajumissaarpakka piginneqatigiiffimmik pilersitseqqullugit, aalisariummik avataasiorsinnaasumik peqalersinnaaqqullugit, Aalisarnermut Piniarnermullu Naalakkersuisoq, Hans Enoksen (PN) tusagassiuuteqarfinnut nalunaaruteqarpoq.

Qaqortumi, Narsami Nanortalimmilu umiatsiaararsortut tunitsivinnut tunisinissaminnut periarfissaqarput. Aalisartut tunisartagaat amerlagisassaanngillat, aalisarfigisartagaanni aalisakkat pisarineqarsinnaasut amerlasoorsuunngimmata.

Tamanna pissutigalugu aalisartut piginneqatigiiffiliornissaannik, Hans Enoksen (PN) kaammattuuteqarpoq.

Kujataani aalisartut siunissami kinguussaavallaartinneqassanngippata nutaamik aaqqissuussivigineqartariaqarput. Nutaaliornerit ilaat tassaasariaqassaaq avataasiorsinnaasumik aalisariutitaarnissaat, pisat aalisariummi tunisassiaralugit suliarineqarsinnaasassallutik, ilaalli nunami tunisassiorfinnut tulaanneqartassallutik. Takorloorpara piginneqataasussat tassaassasut aalisartut, Naalakkersuisoq Hans Enoksen siunnersuivoq.

Raajarniartoqarnissaa kissaatigaa

Iluatsillugu Hans Enoksenip (PN) sinerissap qanittuani raajaqassuseq misissorlugu misileraasoqarnissaa ammaakkumavaa. Ukiunimi kingullerni Kujataani raajarniartoqarsimanngilaq.

Tamanna pissutigalugu Kujataani raajanut tunitsiveqanngilaq, taamaammat raajarniartoqarsinnaalissappat raajarniutit pisatik namminneerlutik aalisariummi tunisassiarisariaqassavaat.