naalakkersuisunngortoq
Hans Enoksenip Finn Karlsen taperserniarpaa
Inatsisartuni attaviitsoq Hans Enoksen Finn Karlsen taperserlugu Inatsisartut immikkut ittumik ataatsimiinneranni taasiniarpoq
Hans Enoksen, ilaatigut Siumup aalisarnermut politikkimik ingerlatsineranut akerliulluni ukiortaap kinguninngua partiimit anisoq, Finn Karlsenip Siumumeersup aalisarnermut piniarnermut nunalerinermullu naalakkersuisutut innersuunneqarnerani tapersersiilluni taasiniarpoq. Hans Enoksen Sermitsiaq.AG-mut ataasinngornermi ullaap tungaa taama ilisimatitsivoq.
Atuaruk: IA: Taamaammat taaseqataassanngilagut
Hans Enoksen naalakkersuisuni siulittaasuunermi nalaani Finn Karlsen aalisarnermut, piniarnermut nunalerinermullu naalakkersuisutut toqqarpaa. Ataasinngornermi Inatsisartut immikkut ataatsimiinneranni Hans Enoksen Finn Karlsenimut taperseeqqinnissaminut piareersimavoq.
Atuaruk: Naalakkersuisooqatigiit ima ingerlaqqissapput
Aalisartuaqqat illersorpai
- Aalisarneq pingaarutilerujussuuvoq. Taamaattuminguna aalisarnermut politikkip aqunneqarnera akerleralugu Siumumiit anisunga. Suliat torersumik ingerlaqqilernissaat piumasaraara. Taamaammat eqqumiissagaluarpoq aalisarnermut politikkip aqunneqarnerata iluarseriutissaanut akerliullunga taasissaguma, Hans Enoksen Sermitsiaq.AG-mut oqarpoq.
Atuaruk: Finn Karlsen naalakkersuisunngussaaq
Naak Siumumiit anereeraluarluni taamaattoq upperaa Finn Karlsenip suliaq naalakkersuisuni ilaasortaagaluartumit Karl Lyberthimit Siumumeersumit pitsaanerusumik ingerlassinnaassagaa.
- Finn Karlsenip politikkikkut eqqarsariaasia uannut qanittuararsuuvoq. Tamatta illersugaraavut aalisartut pissakinnerit. Taamammat Finn Karlsenip naalakkersuisuni ilaasortassanut siunnersuutigineqarnerani ataasinngornermi immikkut ittumik ataatsimiinnermi tapersiilluta taasiumaarpunga, Hans Enoksen oqarpoq.