pisassiissutit
Enoksenip aalisagartassiissuutit 10 procentii toqqorpai
Avataasiortunut alisagartassiissuutit agguaanneqaqqammerput. Hans Enoksenip nutaanik misileraanera Sulisitsisuniit assut eqqumiigineqarpoq.
Pisassiissutit avataaniittut agguaanneqartarnerisa najoqqutaat - raajat ilanngullugit - naalakkersuisoqarfiup paasissutissiissutitut februaarip arfineq-pingajuanni nassiummagu qiviaannarlugu ippinnartoqanngilaq.
Sulisitsisulli allatut agguaasseriaaseqartalertoqarsimasoq ingerlaannaq malugalugu tusagassiuutinut nalunaaruteqarlutik qisuariarfigaat.
Umiarsuaateqarfiit ukiup siuliatut pisassinneqarnermisut annertoqataanik siulliullutik pisassinneqartalernerannik aalisarnermut naalakkersuisoqarfimmit aalajangiunneqarsimavoq. Pisassiissutillu sinneruttut umiarsuaateqarfinnut pioreersunut agguaanneqassallutik.
Taama suleriuseqarneq akerlilerneqanngilaq. Hans Enoksenili ima allappoq:
- Nutaanik aalisarnermut inuussutissarsiuuteqalerumasunik peqartoq takussutissaqartoq nalilersorneqarpoq. Taamaammat qalerallit, saarulliit suluppaakkanullu pisassat 10 procentii illikartinneqarput kingornatigut suliffeqarfinnit inuinnarnilluunniit aalisagartassaqanngitsunut qinnutigineqarsinnaanngorumaarlutik.
"Aalajangerneq paasiuminaatsoq"
Taama aalajangerneq Sulisitsisuni pisortap Brian Buus Pedersenip paasiuminaatsippaa.
- Nunaqavissut aalisariutaat amerlareertut taama aalajangerneq inuiaqatigiit annaasaqaatigissavaat. Aalisarnermi inuussutissarsiuteqartut amerliallannerisa amerlavallaanik aalisartoqalerpat inuiaqatigiit annaasaqaatigissammassuk. Sooq aalisartortavut pioreersut alisartinneqassanngillat? Brian Buus Pedersen aperivoq. Aalisarnermut politikki allanngortinniarneqartoq taanna isumaqarpoq.
Aalisartunik iluamik aalisartitsinnginneq inuiaqatigiit annaasaqaatigissagaat Sulisitsisuni pisortap ikkuarpaa. Naalakkersuisullu inuussutissarsiutillit nutaanillu aallartisaasut suleqatigeqqullugit kaammattorlugit.