namminiilivinneq
Hans Enoksenip 2021-mi namminiilivittoqarnissaa piumasaraa
Partii Naleraq Hans Enoksen siuttoralugu Siumup ataatsimeersuarnermini Nunatta qaqugu naalagaaffeqatigiinnermit anilluni namminiivinissitta ullulerneqarsimannginnera assut pakatsissutigaa.
Nunarput ukiut sisamat qaangiuppata – 2021 – Hans Egedep Nunatsinnut tikinneranit ukiut 300-t qaangiunnerini – namminiilivinnissaa pissusissamisoortoq, Hans Enoksenip Nanoq Mediamit apeqqarissaarfigineqarnermini paasissutissiaraa.
Vittus Qujaukitsoq, Kim Kielsenimut unammillertoq, siulittaasunngorniunnermilu ajorsartoq, Nunatta ukiumoortumik Danmarkimit 4 milliardinik bloktilskudimik pissarsisanngikkaluaruniluunniit napasinnaasutut isumaanik, Hans Enoksenip isumaqatigaa.
- Nunarput ullumikkornit akikinnerusumik ingerlassinnaavarput. Ullumikkummi marloriaammik sulinerit ingerlanneqartarput, Hans Enoksen oqarpoq, allaffissornikkulli tikisitat ullumikkut piffissami sivikitsuinnarmi Nunatsinni sulisorineqarnerinut aningaasartuuterpassuit tikkuarpai, tikisatammi atorfinitsinneqarneri tamarluinnaasa akisoorujussuusarpoq.
Namminiilivinnissamut apeqqut oqaluuserineqalernissaa Partii Naleqqamit anguniarneqassamaartoq, taassuma oqaatigaa.