Hans Enoksen: Henrik Fleischer Siumumut nuulerpoq
Henrik Fleischeriup sooq Partii Naleraq qimanneraa partiimi siulittaasumit Hans Enoksenimut paasiuminaatsinneqarpoq. Henrik Fleicherip Partii Naleraq nalunaarfigisimavaa Siumumut ilaasortanngulerluni
- Paasiuminaatsittorujussuuarput Partii Naleraq qimammagu. Nammineq oqaatigaa Siumumukarniarluni. Siulersuisunut naapikkatta tamanna oqaatigaa.
Henrik Fleischer Partii Naleqqamit arfininngormat nalunaaruteqareersoq Partii Naleqqami siulittaasoq Hans Enoksen Sermitsiaq.AG-mut oqarpoq.
- Misigisimavugut nuannerpallaanngitsumik. Naalakkersuisooqatitsinninngaanniit aalisarneqarsimassaguni tupinnartorujussuussaaq. Tamanna pisimappat siulersuisuni eqqartussavarput qanoq kinguneqartitsisoqarsinnaassanersoq, Hans Enoksen oqarpoq.
- Henrik Fleischerip Partii Naleraq sooq ilaasortaaffigiunnaarneraa paasiviuk?
- Tamanna akisinnaanngilarput. Henrik Fleicherimut aaqqiagiinngissuteqanngilanga, aamma sulinera iluarisimaartaqaarput. Ilisimasatsiarsuit tassa annaavagut, Partii Naleqqami siulittaasoq akivoq.
Inatsisartuni ataatsimiititaliani Henrik Fleischer neqeroorfigineqarsimagaluartoq Hans Enoksenip oqaatigaa.
- Ataatsimiititaliani pingaartuni neqeroorfigineqarnikuuvoq, kisianni tigujumasimanngilai. Ataatsimiititaliani perusunngikkaluartoq pissarsivoq. Soqutiginerorpasippaa nunanut allanut sillimaniarnermullu ataatsimiititaliaq. Aalisartuummat kiisalu aalisarnermut inatsisissaq sukataarussutigeqimmagu periarfissaq tunniukkaluarparput tassa aalisarnermut ataatsimiititaliami siulittaasutut, kisianni tamanna perusunngilaa, Hans Enoksen oqaluttuarpoq.
Henrik Fleischeriup Partii Naleqqami ilaasortaajunnaarnera Hans Enoksenip paasiuminaatsittorujussuuaa.
- Inatsisartut suli pisortatigoortumik ataatsimiilinngillat aamma suliaalluunniit suli aallartinngikkaalluunniit taamatut nuuttoqarnera ajuusaarnartorujussuuvoq. Kisianni ajunngilaq, tamaakkaluartoq suli sulinerput ingerlatissavarput, Hans Enoksen oqarpoq.