Enoksen: Aalisarnermut inatsit inaarutaasumik suli isummerfigineqanngilaq
Naalakkersuisut aalisarnemut inatsisissatut siunnersuutaat Inatsisartuni ukiaanerani ataatsimiinnermi oqallisigineqassanersoq suli aalajangiiffigineqanngitsoq Inatsisartuni siulittaasoq Hans Enoksen tusagassiutinut nalunaaruteqarpoq
Tusagassiunut nalunaarummi Inatsisartuni siulittaasoq Hans Enoksen nassuiaateqarpoq.
Oqaaseqaatit
Aalisarnermut naalakkersuisoq Erik Jensen KNAPK-mik Sulisitsisunillu oqaloqateqarnermini oqariartuutigaa Naalakkersuisut aalisarnermut inatsisissatut siunnersuutaat Inatsisartut ukiaanerani ataatsimiinneranni saqqummiunneqassasoq.
Ulluni kingullerni aalassassimaartoqarnera Hans Enoksenip eqqissisimasumik tiguaa.
- Siunnersuutit saqqummiussassatut kissaatigineqartut Inatsisartut ataatsimiinnissaat sapaatit akunnerinik tallimanik sioqqullugu Siulittaasoqarfimmut nassiunneqassapput. Taama piffissaliinikkut ilaatigut siunertarineqarpoq siunnersuuteqarpassuarnik suliassaminnik misissuinissamut Inatsisartunut ilaasortat piffissaqarnissaannik qulakkeerinninnissaq, Hans Enoksen tusagassiutinut nalunaarummi erseqqissaavoq.
Immikkut akuersineq
- Naalakkersuisulli tamatumunnga immikkut pissutissaqartillugu piffissaliussap saneqqunneqarnissaanik siumoortumik qinnutiginninnissaminnut periarfissaqarput. Aalisarnermut inatsimmut tunngatillugu immikkut taama akuerineqarnissaq Naalakkersuisut qinnutigaat Siulittaasoqarfimmullu nalunaarutigalugu inatsisissatut siunnersuut Inatsisartunut ulloq 21. september nassiunneqarsinnaassasoq, nangilluni nassuiaavoq.
- Immikkut akuerineqarnissap itigartitsissutigineqarneranik Siulittaasoqarfik Naalakkersuisunut nalunaaruteqanngilaq allatigulluunniit Naalakkersuisunut imaluunniit Aalisarnermut, Piniarnermut Nunalerinermullu Naalakkersuisumut ”inissiinani”. Allaallumi immikkut akuerineqarnissamik qinnuteqaat Siulittaasoqarfimmit suli inaarutaasumik isummerfigineqanngilaq. Siulittaasoqarfik aatsaat taamaliussaaq inatsisissatut siunnersuut Siulittaasoqarfimmit tiguneqarpat, Hans Enoksen oqarpoq. Taamaasilluni Erik Jensenip KNAPK-mut Sulititsisunullu oqariartuutigisimasai akerlilerneqarput.
Pissanganartorsiornertaqanngilaq
Suliap pissanganartorsiornertaqanngitsumik suliarineqarnissaa Hans Enoksenimit neriuutigineqarpoq.
- Tamanna pissanganartorsiornertaqanngilaq; Siunnersuutip illersorneqarsinnaasumik suliarineqartussanngortinneqarnissaa Siulittaasoqarfiup soorunami nakkutigisassaraa; tassungalu ilaavoq inatsisissatut siunnersuutip ilusiligaanermigut pisariaqartumik pitsaassuseqarnissaa aammalu inatsisissatut siunnersuummik misissuinissaminnut Inatsisartunut ilaasortat naammattumik piffissaqartinneqarnissaat.
Naalakkersuisoq oqaaseqanngilaq
Erik Jensenip oqaaseqartinnissaa anguniarlugu Sermitsiaq.AG-mit sulissuteqartoqaraluarpoq, sulili Erik Jensenip tungaanit tusarliisoqanngilaq.
Aalisarnermut naalakkersuisoq sisamanngormat tusagassiutinut nalunaaruteqarpoq, apeqqutigineqartorli suli oqaaseqarfiginngilaa. Tassami KNAPK-mut Sulisitsisunullu oqariartuutigereerpaa siunnersuut ukiaanerani ataatsimiinnermi saqqummiunneqassasoq, tamannalu qanoq qulakkeerneqassanersoq tusagassiutinut nalunaarummi erseqqissaavigineqanngilaq.