isumaqatigiinniarnerit
Hans Enoksen: Suna tamaat akigissanngilarput
Partii Naleqqap qularilluinnarpaa Siumut siuttoralugu naalakkersuisooqatigiinni peqataasinnaanissartik
Naalakkersuisunngortitsiniarluni sisamanngornermi isumaqatigiinniarnerni Siumup piumasaqaatai partiinut agguaanneqarput. Suut pineqarnersut partiit isertuuteqqissaarallarpaat, isumaqatigiinniarnerilli killiffiat pillugu Partii Naleraq ammaneruvoq.
- Piumasaqaatinik tunineqarpugut. Piumasaqaatit taakku imaasiallaannaq uagut iisinnaanngilagut, Partii Naleqqap siulittaasua Hans Enoksen Sermitsiaq.AG-mut oqarpoq.
Sorpiaalli pineqarnersut qulaarnianngikkallarpaa.
- Piumasaqaatit qineqqusaarutitsinnik tunussinermik kinguneqartussat akuersaarsinnaanngilagut. Partiitut nutaajulluinnarpugut taamaattumik partiimi avissaartuussutaasinnaasut peqataaffigisinnaanngilagut asuli naalakkersuisooqataaniaannarluta, Hans Enoksen oqarpoq, assullu qularalugu isumaqatigiissutissatut siunnersuut tigusimasartik malillugu naalakkersuisooqatigiinni peqataasinnaanissartik.