Enoksen pissuserissaarnissamik piumasaqartoq: Issussuit eqqaaneqaqqissanngillat
Kinguaassiuutinik eqqartuineq aningaasanut inatsisissaq pillugu isumaqatigiinniarnernut immaqa ilaasussaanngilaq, kisianni oqallinneq sivisooq sakkortunerpaaffissaminiilermat politikerit tunuarsimaarsinnaasimagunanngillat.
Akunnerit arfinillit affarlu. Nunatta 2022-mut aningaasaqarnikkut naatsorsuutai Inatsisartuni oqaluuserineqarmata oqalukkumatussuseq aaqqiagiinngissuteqaqqajaanerlu taama annertutigipput. Aamma naak Demokraatineersoq Jens Frederik Nielsen aallarniutigalugulu maluginiakkani tunngavigalugit oqaraluartoq, inatsisissaq 600-t sinnerlugit quppernilik piffissaajarfigissalluguluunniit pisariaqanngingajakkaluartoq:
- Aningaasanut inatsisissatut siunnersuut, sunniuteqartussaanngitsutut taasinnaavara. Politikkikkut anguniagaqartoqanngilaq. Allamik imaqanngilaq ingerlatsinermut tunngasuinnaat. Suliniutinut nutaanut imaqannginnera annertoqaaq, ataatsimoorlutalu tamanna allanngortinngikkutsigu, ukiup ataatsip annaaneranik isumaqassaaq.
Pissutsit tamaasa iserfiginiassagaanni politikeritut assuanaatsuusariaqarpoq. Siunnersuut 640-nik qupperneqarpo, aaqqiagiinngissutaasinnaasunillu sammisalluunniit ineriartornerinik takkuissaanani. Tulukkamik illup qalianiit qaliap tullianut timmisumik isiginnaarnertut atuassallugu pissanganartigikannerluni.
Marlunngormat siullermeerneqarpoq, tallimanngormallu matoqqasumik naapeqatigiinnerit tigussaanerusut aallartillutik. Partiit pilersaarutit naapertorlugu kissaatitik piumasaqaatillu saqqummiukkiartorlugit paarlakaajaallutik takkuttassapput, aningaasaqarnermullu naalakkersuisoq Asii Chemnitz Narup (IA) isumaqatigiinniarfigineqassalluni, taannalu ilimasaarivoq, naaperiaanissanut piareersimalluni, kisianni aamma killissaqartoq.
Allaaserisaq tamaat uani AG-mi pisiarisinnaasanni atuaruk: