Naalakkersuisooqatigiilersut

Enoksen pakasarneqartutut misigisimavoq

Partii Naleraq naalakkersuisunngortitsinissamik isumaqatigiissummi naggatissaa tikillugu peqataasimagaluarput. Pilersaarutilli allanngortinneqarsimasut naalakkersuisunngortitsinissamillu isumaqatigiissusiortoqarsimasoq kiisalu tusagassiortunik katersortitsisoqalersoq tusagassiorfitsigut tusarsimavaat

- Pakasarneqarsimasutut misigaanga, Partii Naleqqami siulittaasoq Hans Enoksen oqarpoq

- Pakasarneqarsimasutut misigaanga, Partii Naleqqap siulittaasua Hans Enoksen oqarpoq.

Hans Enoksen Namminersorlutik Oqartussat allaffissuanni allaffimmini issiavoq, naalakkersuisunngortitsinissamik isumaqatigiissut 23-nik quppernilik saavaniippoq. Partiit sisamat ilisarnaataat isumaqatigiissutip saqqaani takuneqarsinnaavoq. Partiit pineqartut tassaapput Siumut, Demokraatit, Atassut aamma Partii Naleraq. Taamatulli pisoqanngilaq.

- Siumukkormiut oqaloqatigereerlutigit isumaqatigiissutigisatsitut suli oqaluuserisassaqariaratta partiitsinni siulersuisuunerit ataatsimeeqatigiartorpavut. Siumup iluaagisaqarneranik tamatuma nalaani sumilluunnit pasinartoqanngikkaluarpoq, Partii Naleqqap siulittaasua oqarpoq.

Naalakkersuisunngortitsinissamik isumaqatigiinniarnerit tamarmik unneqqarissumik ataqqeqatigiillunilu ingerlanneqassasut Siumukkullu isumaqatigiissutigineqarsimagaluarpoq, tamannalu tunngavigerpiarlugu partiit allat suleqatigineqarsinnaanerat Partii Naleqqap oqaloqatigisimanngilai.

- Siumukkut ajornartorsiuteqartoqarnera pillugu ilisimatittussaasimagaluarpaatigut, tunuinnarnata. Pissuserissaarnerunngilaq, oqarpoq.

Piumasaqaatititik sakkukinnerulersissinnaasimagaluarpaat
Ineqarnermut akiliutip appartinneqarnissaa, aalisagartassat amerlineqarnissaat, pisortat suliffeqarfiutaanni kalaalinngorsaanissaq, inuuniarnikkut atukkat pingaartumik isorliunerusuni pitsanngorsarneqarnissaat minnerunngitsumillu aatsitassanik uranitalinnik piiaasoqartinnagu sukumiisumik misissuisoqaqqaartarnissamik piumasaqaatigisatik Siumumut sakkortuallaarsimagunartut Partii Naleraq isumaqarpoq.

- Piumasaqaatitsinnik sakkukillilerisimasinnaagaluarpugut, naaperiaasinnaalluta. Allaat uranimut tunngatillugu partiit tamarmik peqataaffigisinnaasaannik isumaqatigiissusiornissamut piareersimagaluarpugut. Tamakkuli tamarmik naammassimagunanngillat, Hans Enoksen nassuiaavoq.

Naalakkersuisunngortitsisussat isornartorsiorpai
Partii Naleqqap anguniagassatut pingaartitani allanngortinnavianngikkai isummanilu allanngortinnavianngikkai Hans Enoksen oqarpoq.

- Mittarfiit amerlanerusut innuttaasut massakkut atorfissaqartinneqanngillat. Naalakkersuisunngortitsinissamut isumaqatigiinniarnerni ilaatigut tamatuminnga tunngasoq isornartorsiornikuuarput. Akissaatikinnerit timmisartornissaminnut akissaqanngillat. Inuuniarnermili atukkat pitsanngorsarneqarnissaat atorfissaqartinneqarpoq, erseqqissaavoq.

Powered by Labrador CMS