Hans Enoksen kommunalbestyrelsimi ilaasortanngoqqittoq
Naleqqami siulittaasujunnaartoq kommunalbestyrelsip kingullermik video aqqutigalugu ataatsimiinneranut peqataavoq.
Hans Enoksen siorna kommunimut qinersisoqarmat, Qeqqata Kommuniani taaguunneqarnerpaanut ilaavoq, partiimi siulittaasuujunnaartoq 419-inik taaguunneqarsimalluni.
Hans Enoksen kommunimut qinersisoqarsimatsiarnerata kingornatigut Inatsisartuni suliaqarnini pissutigalugu kommunalbestyrelsimit sulinngiffeqarnissamik qinnuteqarpoq. Taamanikkummi Hans Enoksen IA-p Naleqqallu naalakkersuisooqatigiilernerannut atatillugu Inatsisartuni siulittaasussatut toqqagaangami.
Politikkeri maanna najukkami politikkerinngoqqippoq. Tamanna Qeqqata Kommuniani kommunalbestyrelsip kingullermik ataatsimiissimaneranit imaqarniliami atuarneqarsinnaavoq.
Juunip 23-ani ataatsimiittoqarpoq, tassanilu Hans Enoksen ataatsimeeqataavoq, kommunalbestyrelsimullu uteqqinnissamik qinnuteqaataa suliarineqarluni.
Hans Enoksenip qinnuteqaatini maajip 31-anili tunniussimavaa, tamatumalu kingornatigut borgmesterimit Malik Berthelsenimit (S) qinnuteqaataa akuerineqarsimalluni. Borgmesterip aalajangernera kommunalbestyrelsip ataatsimiinnerani tusaatissatut tiguneqarpoq.
Juunip 20-ani saqqummiunneqarpoq, Hans Enoksen inuttut atukkani pissutigalugit Naleqqami ingerlaannartumik siulittaasutut tunuarsimasoq.