Enhedslisten: Naalagaaffeqatigisavut peqataatinneqarlik
Enhedslistenimeersup Christian Juhlip Issittumi sakkussiornermut tunngatillugu Kalaallit Nunaata Savalimmiullu peqataatinneqartarnissaaq sorsuutigaa.Folketingimi ilaasortaq Aaja Chemnitz Larsen isumaqarpoq ilaatigut peqataatinneqarsimallutik.
Folketingimi amerlanerussuteqartut Issittumi Atlantikullu Avannaani danskit illersornissaqarfiat nukittorsarniarlugu piginnaanngorsaanissamut 1,5 milliarder koruunit immikkoortinneqarnissaat qaammami matumani siusinnerusukkut aalajangiuppaat.
Piginnaanngorsaanissami ilaatigut pineqarput Savalimmiuni radariliinissaq, satelitsikkut pitsaanerusumik nakkutilliinissaq, dronit atorlugit nakkutilliinissaq aamma Kalaallit Nunaanni illersornissamut nutaamik ilinniartitsinissaq.
Naalagaaffeqatitsinni nunat marluk, Kalaallit Nunaat Savalimmiullu isumaqatiginninniarnermut peqataatinneqarsimanngillat, naakk nunat taakku marluullutik Folketingimi ilaasortaatitaqaraluartut, Enhedslisten sinnerlugu folketingimi ilaasortaq Christian Juhl tusagassiorfinnut nalunaaruteqarluni oqarpoq.
- Suliassami taamak pingaaruteqartigisumi isumaqatiginninniarnermut Atlantikup Avannaanni suleqativut marluk isumaqatiginninniartussanit ministerimillu qaaqquneqarsimannginnginerat kanngusuusaarnarpoq, taanna allappoq.
IA-li sinnerlugu Folketingimi ilaasortaq oqarpoq, Kalaallit Nunaat ilaatigut peqataatinneqarsimasoq.
- Ilisimatinneqarsimanera naapertorlugu Naalakkersuisut siorna aggustusimili peqataatinneqarsimapput, taamaammat Inatsisartut ilisimatinneqarnissaannut piffissaqarluartoqarsimagaluarpoq, taanna oqarpoq.
Savalimmiuni piffissami kingullermi Radariliinissamik pilersaarut aamma Savalimmiuni suli akuersisoqanngitsoq Danmarkip tamatumannga nalunaaruteqarsimanera Savalimmiuni piffissami kingullermi oqallisigineqarsimaqaat.
Illersornissamut ministerip Trine Bramsenip suliaq pillugu tusagassiortunik katersortitsinermi erseqqissaassutigaa, Savalimmiormiut akuersaarsimanngippata Savalimmiut radarilerneqassanngitsoq. Christian Juhlili isumaqarpoq, Follketingi suliami matumani akisussaaffimminik malinnissimanngitsoq.
- Folketingimi allassimanngitsutut ileqqoraarput, aalajangiiffigisassat Kalaallit Nunaannut Savalimmiunullu tunngassuteqartut, taakku nunamik inatsisartuini oqaluuserinnissimatinnagit aalajangiiffigisaratigit. Tamannali naalakkersuisut folketingimilu ilaasortat amerlanerit soqutiginngilaat, taanna oqarpoq.
- Suliami matumani nunat taakku marluk naalakkersuisui ilisimatinneqaannarsimapput. Taamatut aalajangerneq Savalimmiuni oqallisigineqarluni aalassatsitsinera paasisinnaalluarpara. Naligalugit suleqatigisat taamatut pineqartussaanngillat, Christian Juhl oqarpoq.
Aaja Chemnitz Larsen isumaqarpoq, Naalakkersuisut suliaq pillugu Inatsisartunik oqaloqatiginninnissamut periarfissaqarsimasut.
- Inatsisartunik peqataatitsinissamut atatillugu Naalakkersuisut tamatumannga siusinnerusukkut salliutitsisimannginnerat pitsaanngilaq, taanna erseqqissaavoq.
Aaja Chemnitz Larsenilli Christian Juhlip peqataatitsisarnerup pitsaanerusinnaaneranik oqaaseqarnera isumaqatigaa.
- Tamaasa ataatsimut isigissagaanni isumaqarpunga, ilaasortat atlantikup avannaaneersut isumaqatiginninniarnerni peqataatinneqartariaqartut, pingaartumik Kalaallit Nunaannut Savalimmiunullut tunngassuteqartut pineqartillugit. Tamannalumi aamma ministerimut oqaatigisarpara, taassuma Issittumut tunngassuteqartut pineqartillugit isumaqatiginninniaqataasarnissarput itigartinngilaa, taanna oqarpoq.
- Taamatulli oqareerlunga peqataatinneqarsimalluta isumaqarpunga. Ministeri sapaatip akunneri arlallit matuma siornatigut ataatsimeeqatigaara, aamma Kalaallit Nunaannut tunngatillugu Ataatismiititaliami tamanna oqaluusersimavarput. Peqataatinneqarnerusarnissarput aamma naligiittut peqataatinneqartarnissarput, pingaartumik sulianut Kalaallit Nunaannut tunngassuteqartunut kissaatigiuaannarpara, taanna naggasiilluni oqarpoq.