ataatsimiititaliaq
Enhedslistenip Aaja taperserpaa
Kalaallit Nunaannut ataatsimiititaliaq Venstremeersumit Marcus Knuthimik siulittaasuuffigineqalermat, IA annertuumik isornartorsiuivoq. IA-lu isornartorsiuinermini maanna partiimit Enhedslistenimit taperserneqarpoq
Ippassaq sisamanngornermi Folketingimi ataatsimiititaliani ilaasortaaffiit inuttalersorlugit agguaanneqarput. IA-llu tungaaninngaanniit annertuumik naammagittaalliortoqarpoq, Kalaallit Nunaannut ataatsimiititaliaq Venstremeersumit Marcus Knuthimik siulittaasuuffigineqalermat. Maanna Enhedslistenimit Inuit Ataqatigiit Venstrep ataatsimiititalianik agguaassinermi piumasaqaataannut isornartorsiuinerannut tapersiipput.
Venstremit piumasaqaat tassaavoq, Danmarkip iluani pissutsit taasissutigineqassatillugit Inuit Ataqatigiit taaseqataasannginnissaat.
Atuaruk: IA: Aalajangiineq nikallornartuuvoq naalagaaniarpalaartuullunilu
- Danmarkimi naalakkersuisut aalajangiinerannut IA-p kamassuteqarnera paasisinnaavara. Venstre taamatut piumasaqarnerminni kalaallit nipangersimatinniarlugit misiliipput. Danmarkip iluani pisunik taaseqataasassanngikkunik, siulittaasuuffik pissarsiarisinnaavaat. Imaluunniit allatut oqaatigalugu: Siulittaasuuffik aatsaat pissarsiarisinnaavaat, nunat avannarlernit ilaasortat ilanngutissagaanni naalakkersuisut ataasiinnarmik amerlanerussuteqartut eqqissisimatissagunikkit.
Enhedslistenip Kalaallit Nunaat pillugu oqaaseqartartua, Christian Juhl, tusagassiuutinut nalunaarummini taama oqarpoq.
Atuaruk: Kalaallit Nunaannut ataatsimiititaliami Venstremeersoq siulittaasunngorpoq
Makitaneq aamma anneruniarneq
Enhedslistenip Nordisk Rådimut, issittumi avannarlermi, Kalaallit Nunaannut aamma Savalimmiunut oqaaseqartartuata, Venstrep Kalaallinut Nunaat pillugu isumaat anneruniarnerarpaa.
- Matumani Venstrep aamma Danmarkimi naalakkersuisut isumaat makitaneruvoq anneruniarnerullunilu. Kalaallit siulittaasuuffik tigumminngippassuk, kikkuussagamik? Takutiinnarpaat naalaagaaffeqatigiinnut avannarlersaasunut qanoq ataqqinninngitsiginertik - ukiunilu makkunani Kalaallit Nunaat pillugu politikkikkut sammisat oqallisigisassat pingaaruteqartigisut, Christian Juhl tusagassiuutinut nalunaarummini taama oqarpoq.
Partii Enhedslisten uani Folketingimi qinigaaffiusumi 14-inik Folketingimut ilaasortaatitaqarpoq.
Atuaruk: Aleqa: Nukissanik asuli atuerusunngilanga