Skip to main content

Ajugaanngitsoortut: Iranimut unammineq ilungersunartoq

Kalaallit Nunaat assammik arsarluni VM-imi unamminermi kingullermi aallartilluaraluarpoq, unamminerli pissanganartumik ingerlareersorlu ajorsarnermik aamma kinguneqarpoq.

Kalaallit assut! Iran inaarutaasumik unamminermi naapissavaat

Kalaallit Nunaannit arnat assammik arsarlutik nunanut allanut unammisartut nunarsuarmi pissartanngorniunnermi ajugaasinnaanissaminnut ullumikkut naggataamik periarfissaqarput. Iran unamminermi naapissavaat, taakku nr. 31-nngorniunnermi ukiut marluk matuma siorna ajugaasimapput.

Paraguayimut unamminermi naligiinnerusut

Kalaallit Nunaat inissinniunnermi pingasunngorpat Iran unammisussanngorpaat. Paraguayimi unamminermi ullumi 21-19-imik ajorsarput.

Kalaallit Nunaat Kinamut unammilluaavippoq

Kalaallit Nunaat arfininngornermi Kinamut Presidents Cup-imi unamminermi Kinamut 24-32-mik ajorsarpoq.

Kalaallit Illuutaat Aalborgimiittoq: Arnat assammik arsartartut ilassikkit

Nunarput sinnerlugu arnat assammik arsarlutik nunanut allanut qunusueqalutik unammisartut sapaatiuppat qasuersaarfissartik atussavaat Kalaallit Illuutaat Aalborgimiittoq pulaarlugu.

Kalaallit Nunaat aallartilluaraluarluni Islandimut ajorsarpoq

Kalaallit Nunaat 14-37-mik Islandimut ajorsarpoq Presidents Cup-imi unamminerit siullersaanni.

Nunanut allanut unammisartut President Cupimi unammilersut

Nunanut allanut unammisartut President Cupimi sisamanngornermi unammeqqaarnerminni Islandimut unammissapput.

Frederikshavnimi VM-imut peqataaneq: Pointinnanniarluni ilungersorneq

Anguniagassaq ajornarluinnaraluarpoq, nunanulli allanut unammisartut Stavangerimi alutorineqarluarput, kalaallillu uummataannut »ataavartumik inissisimalerlutik«. Nunanut allanut unammisartut Frederikshavnimi siullerpaamik pointinnannissartik ilungersuutiginiarpaat.

Østrigimut unammineq: Kukkuluttornerit akisunaarneqartut

Nunanut allanut unammisartut Stavangerimi eqimattakkaani unamminerat kingulleq Kalaallit Nunaannut periarfissaqarfiuneruvoq. Unamminerulli naalernerani kukkuluttortaarnerit kingunerannik Østrig isaatitsingaatsiarpoq.

Unammineq kingulleq: Kalaallit Nunaat Østrigimut unammilerpoq

Kalaallit Nunaat nunarsuarmi pissartanngorniunnermi eqimattani unamminissaminut piareeqqippoq. Østrig ullumi unammineqassaaq. Tamatuma kingorna Frederikshavnimi President's Cupimi unamminerni peqataassapput, nunat arfineq-marluk unammeqatigissallugit.

Kalaallit akersuulluaqisut Sydkorea unammillerpaat

Kalaallit Norgemut unammereerneranni illersueriaaseq sukanneqarsimavoq saassussinerillu sukkanerulerlutik. Ullumi unamminermi Sydkorea unammillerneqarluarpoq. Kalaallillu unammisartuannit unamminermi unammilluarnerpaatut toqqaasoqarpoq.

Piffissanngorpoq: Kalaallit Nunaat Sydkoreamut unammilerpoq

Kalaallit arnat assammik arsarlutik nunanut allanut unammisartut tallimanngornermi nal. 18.00, tassa nunatta nalunaaqutaa malillugu nal. 15.00 unammeqqittussanngorput. Timersuutini angusinnaasanik naatsorsuisarfik, spilxperten.com naapertorlugu Kalaallit Nunaat tupaallatsitsisinnaavoq, tamannali ajornaatsuinnaanavianngilaq.