Emanuel Nûko marlunnik qinigaaffeqassaaq

Emanuel Nûko Tasiilameersoq qinersinerup kingorna aalajangeraluarpoq Kommuneqarfik Sermersuumi kommunalbestyrelsemit sulinngiffeqarnissamik qinnuteqassalluni Inatsisartuni sulinini ukkatariumallugu. Inatsisartuni sulinermi piareersaaterpassuaqartarmat suliassaqarpallaalernissani ernumagisimagaluarpaa. Maannali isumaa allanngorpoq.

- Naleraq tunuliaqutaralugu Inatsisartuni sulissaanga, aammali kommunalbestyrelsemi ilaasortaassaanga. Qinersisikka ataqqillugit, Tasiilamilu immikkoortortaqarfitta peqqusinera malillugu taama iliorpunga, Emanuel Nûko Sermitsiaq.AG-mut nassuiaavoq.

Taanna nassuiaavoq marlunnik qinigaaffeqarneq suliassarpassuarnik malitseqartartoq ilisimallugu.

- Misilittagaqarfigereerpara qinikkatut sulineq, ilisimaaralugulu Inatsisartuni piareersarneq annertooq pisariaqartartoq. Inuiaqatigiit sullinniarlugit akisussaaffimmik tigusivunga, oqarpoq.

Soqutigisat susassaqarfiillu

29-nik ukiulik, Tasiilameersoq Inatsisartuni sinniisutut issiareersimavoq. Maanna Inatsisartunut qinersinermi 161-init taaneqarpoq, Sermersuumullu 229-nit taaneqarluni.

Erseqqissaavoq Inatsisartuni kommunimilu sulinini immikkoortinniarumaarlugit. Qinersinerli sioqquterujussuarlugu suliniutini arlallit maanna aamma ingerlatissavai.

Kommunimi sulinermini Tasiilami atugassarisaasut pitsanngorsaavigiumavai. Pingaartumik sullissinerup tungaatigut pingaarnersiuisoqarnissaa erseqqissarpaa, Tasiilami sanngiinnerusut ikiorneqarnissaat pillugu.

Qilaluartassat

Inatsisartuni sulinermini Emanuel Nûkop Tasiilami qilaluartassiissuteqarnerulernissamik suliniuteqarumavoq. Taanna isummerpoq ilisimatuussutsikkut kisitsinerit kingulliit eqqortuusinnaanngitsut.

- Ilumoorsinnaanngilaq piniartut 200-t pingasuinnarnik qilaluartassinneqartarnerat. Tasiilaq 3000-init innuttaqartoq amerlanerusunik qilaluartassiiffigineqartalernissaa anguniassavara, imminut pilersornerulernissaq pillugu, oqarpoq.

Inatsisartuni aqagu ilaasortatut ivertinneqassaaq.