Emanuel Nûko eqqartuussaassasoq
Naleraq sinnerlugu Inatsisartuni ilaasortaq Emanuel Nûko Inatsisartuni ilaasortaanermini eqqartuussisulersuunneqarsinnaannginnera ullumi atorunnaarsinneqarpoq. Suna pillugu unnerluussaasimanersoq ilisimatitsissutigineqanngilaq.
Inatsisartuni ilaasortat eqqartuussivimmi imaaliallaannaq eqqartuussaasinnaasanngillat.
Inatsisartuni ilaasortat ilaasortaanerminni eqqartuussisulersuunneqarsinnaanngillat, tamannalu Inatsisartunit taamaallaat atorunnaarsinneqarsinnaasarluni.
Inatsisartut akuereqqaartussaavaat inatsisartuni ilaasortaq unnerluussaasimappat, unnerluussisussaatitaasumit eqqartuussivimmut suliassanngortitsisoqassappat, inatsisartunilu ilaasortaq eqqartuussaassappat.
Inatsisartut marlunngornermi matoqqasumik ataatsimiinnerminni Emanuel Nukop eqqartuussisulersuunneqarsinnaannginnera atorunnaarsippaat.
Suna pillugu unnerluunneqassanersoq suli ilisimatitsissutigineqanngilaq.
Facebookkimini allattoq
Emanuel Nûko Facebookimini tamanut atuarneqarsinnaasunngorlugu nammineerluni allappoq, eqqartuussisulersuunneqarsinnaannginnini atorunnaarsinneqarsimasoq.
- Tassa uangaavoq ullumi unnerluunneqarsinnaannginnera atorunnaarsinneqarpoq, politiit suliaat silaannarmiittoq naammassinissaanut annertunerusumik oqaaseqarsinnaanngilanga, qujavungali tamanna suliarineqartussanngormat piareersimaffigalugulu, Facebookimini allappoq.
Suliat nalinginnartut suliaapput
Inatsisartuni ilaasortat eqqartuussisulersuunneqarsinnaannginnerat tunngaviusumi inatsimmeereerput, qangaaniilli atuuttooreerlutik. Politikerit pissaanerit pingajuannut illersorneqarnissaat siunertaasimalluni.
Inatsisartut ilaasortat eqqartuussisulersuunneqarsinnaannginnerisa atorunnaarsinneqartarnerat nalinginnaasumik maanna ingerlanneqartartoq, Inatsisartullu tamakkiisut nalinginnaasumik akuersisarlutik, Inatsisartoqarfimmi inatsisinik atuutsitsinermut pisortaq Kent Fridbjerg nassuiaasimavoq.
Inatsisinik atuutsitsinermut ministeriaqarfimmit Inatsisartut ilisimatinneqartarput Inatsisartuni ilaasortap eqqartuussisulersuunneqarsinnaannginnerata atuutsikkunnaarnissaanut qinnuteqaateqartoqaraangat.
Naleqqami siulittaasoq, Pele Broberg Sermitsiaq.AG-mut oqarpoq Emanuel Nuko oqaloqatigereerlugu uppernarsarsinnaallugu eqqartuussivimmi suliassaqartoq, annertunerusumilli oqaaseqarniarnani.
- Inatsisartut inatsisiniit qulliunerussanngitsut Naleqqamiit akuersaartuuarput, taamaammallu eqqartuussisulersuunneqarsinnaannginnerup atorunnaarsinnissaannut qinnuteqaat akuerisimallugu.
Aslak Jensenip eqqartuussisulersuunneqarsinnaannginnera siorna aamma atorunnaarsinneqarpoq. Taanna eqqartuussaanermini pisuutinneqarpoq, nunattali eqqartuussivianut suliassanngortitseqqilluni. Aslak Jensen ukiakkut ataatsimiinnerup aallartinneraniit Inatsisartuni ilaasortatut tunuarpoq.