EM-ertoqarnerani Taekwondortartut marlunnik medaaliannattut

Taekwondorluni Europami pissartanngorniutivittoqarnerani Nunarput pingasunik peqataatitaqarpoq, pissartanngorniutivinnierit Tuluit Nunaanni, Liverpoolimi ingerlanneqartut sapaatiummat naammassipput.

Pissartanngorniutivinnerni marlunnik bronzennattoqarpoq.

Villads Mølgaard aamma Angutinnguaq Tittussen bronzennattuupput. Pissartanngorniutivinnerni Daniel Platou Kristiansen aamma peqataavoq.

2. dan-it tul-erneranni Villads Mølgaard bronzennapoq, Angutinnguaq Titussenilu 5. dan-it tul-erneranni aamma bronzennalluni.

Daniel Platou Kristiansen tul-ernerit aallartimmata unamminermi siullermi ingerlaqqinngitsoorpoq.

Frikampimi Villads Mølgaard aamma Daniel Platou Kristiansen unamminerit aappaanni tamarmik ingerlaqqinngitsoorput.

Misilittagakitsut

- Ukioq manna EM-mi peqataanitsinni angusagut assut naammagisimaarpagut, ukiut marluk EM-imut peqataasarnitsinni medaaliannattoqarsimanani massakkut medaaliannattoqarpoq. Siuariartoqqilerneq peqquteqarsinnaavoq piumasaqaatigisagut unammisartutsinnut sukannerulernikuummata, taekwondortartut kattuffiat allappoq.

- Frikamp eqqarsaatigalugu malunnarpoq kalaallit unammisartuisa akulikinnerusumik unammisarnissaq amigaatigingaat, allamiunut unammillersinnaanerunissaq angussagunikku. Neriuppugulli anigaasaliisunik pissarsinikkut unammiarnerit amerlanerit peqataaffigisalersinnaassallugit, kattuffik allappoq.