Elite Sport Greenland nutaamik siulittaasortaartoq

Malik Hegelund Olsen juunip qaammataani Air Greenlandip siulersuisuinut ilannguppoq, tamannalu tunngavigalugu Elite Sport Greenlandimi siulittaasutut tunuarniarluni aalajangersimavaa.

Taamaalilluni maannamut siulittaasup tullerisimasaa Nikolaj Christoffersen siulersuisuni siulittaasunngorpoq.

- Malik ESG-mi pingaarutilimmik suliaqarsimavoq, suleriaqqinnissatsinnullu pitsaalluinnartumik tunngavississimalluta. Maliup siulittaasuunerani ESG kattuffittut ineriartorluarsimavoq, kattuffiullu timersuutip iluani timersullammannik piginnaasaqarluartunillu inerisaalluni suliaqartarnera nukittunerulersissimavaa. Suliap ingerlateqqinnissaa qilanaaraara piffissarlu aggersoq qilanaaraara, tassani ataatsimoortumik periuseqarnissaq suli annertunerusumik qitiutissavarput piginnaanillillu sullinneranni suli annertunerusumik iliuuseqarluta, Nikolaj Christoffersen tusagassiorfinnut nalunaaruteqarnermini oqarpoq.

- Elite Sport Greenlandimi siulersuisunit toqqissisimallunga tunuarpunga, siulersuisummi nukittuut patajaattullu periusissiornerup sinnerani suliassamik isumaginninnissamut piginnaasaqarluarput, Malik Hegelund Olsen oqarpoq.

Siulersuisuni ilaasortaq nutaaq

Nikolaj Christoffersen ESG-mut aningaasaliisartut ilaannit, Tele-Postimit toqqarneqarpoq. Kalaallit Nunaanni timersornermut, 1987-imili peqataaffigisimasaminut ilisimasaqarluarpoq, NÛK-p assammik arsartartuini inuusuttuulluni aallartissimavoq, kingusinnerusukkullu U21-mi nunanut allanut unammisartunut ilaalersimalluni. Nikorlaj ESG-p siulersuisuini suliaqartarnermi saniatigut Nuuk Floorball Clubimi aamma siulittaasuuvoq. Nikolaj Aaqqissuussinermi Aqutsinermilu HD-mik ilinniagaqarpoq, maannalu Tele-Postip immikkoortortaqarfiani pisortaalluni.

Malik Hegelund Olsen Namminersorlutik Oqartussanit toqqarneqarpoq, Namminersorlutillu Oqartussat taamaammat siulersuisuni ilaasortassamik nutaamik toqqaasimapput; Lena Ravn Davidsen. Taanna Nagdlunguami siulittaasuuvoq TAAK-imilu siulersuisunut ilaasortaalluni.

Siulersuisut Inooraq Brandt siuittaasup tulliatut toqqarsimavaat.

Elite Sport Greenlandimi maanna siulersuisuulersut:

Nikolaj Christoffersen, siluttaasoq

Inooraq Brandt, siulittaasup tullia

Naaja Nathanielsen

Peter Fleischer Rex

Lena Ravn Davidsen