Saqqummersitsineq
Elektroniskimik nipilersortartoq aamma rappertartoq saqqummersitsisut
Uyarakq aamma Peand-eL ullumi nuuteeqqamik hip-hopimik saqqummersitsipput
Nuuteeraq hip-hopiusoq 'Kunngiitsuuffik' ullummikkut pingasunngornermi saqqummerpoq.
Aqqalu Engell nipilersortarnerminik 'Uyarakq'-mik ilisarisimaneqartoq aamma rappertartoq Peter Lyberth, Peand-eL nuuteeqqamik saqqummersitsisuupput.
Saqqummersinneqartoq ukioq ataaseq suliarineqarpoq, Uyarakqip siammarterisarfiani nutaami Mediahouse Qunnersuarmi nammineq saqqummersinneqarpoq.
Festini inuiaqatigiit atugaannik isornartorsiuineq
Nuuteeqqami taallat inuiaqatiinni atukkanut isornartorsiuinernit festerpalaartunut imaqarput, taakkulu Uyarakqip beatsiinik ingiorneqarput. Tunngaviusumik nipilersoriaaseq hip-hop atorneqarpoq, kisianni Uyarakq elektroniskimik nipilersornerata silarsuaanit akuugaavoq, tamatumalu Nunatsinni hip-hopimik misileraasumik saqqummersitat siullersaritippaa.
Nuuteeraq KNR TV-mi aallakaatitassiami Piggappaammi nittarsaanneqarnikuuvoq, nipilersortut taakku pulaartorineratigut. Nuuteeqqami pulaartutut nipilersortut sisamat ukuupput: Rappertartoq White Nick-R, produceri Da Bartali Crew, Kuno Hammond Thornstonemeersoq kiisalu Malik Kleist Chilly Friday.
Atuaruk: Apple Musicimi kalaallit nipilersuutaannik tusarnaartoqarsinnaavoq