Elektroniskimik allakkatigut taasisoqarsinnaalissaaq
Kilisaatini inuttat ajornannginnerusumik taasisinnaanngussapput
Elektroniskimi allakkatigut taasisinnaaneq Naalakkersuisut periarfissaalersinniarpaat.
Qinersisarneq pillugu inatsisip allanngortinneqarnissaanut siunnersuummik, tamatuminnga periarfissaalersitsisussamik Naalakkersuisut kingullermik ataatsimiinnerminni aalajangiuppaat.
- Elektronisimik allakkatigut taasisinnaanermut periarfissap ammaanneqarnissaanut tunuliaqutaavoq, eqimattat mikinerit taasinissamut periarfissaqanngimmata imaluunniit taasinissamut ajornakusoortitsimmata, tassa taasineri piffissaq eqqorlugu apuunneq ajormata, naalakkersuisut siulittaassuata naalakkersuisoqarfiani siulittaasoq, Søren Hald Møller, Sermitsiaq.AG-mut taama oqarpoq.
- Kilisaami inuttaasinnaapput, qinersinerup naammassinissaata tungaanut angalasut.
- Tassa naatsumik oqaatigalugu, sapinngisamik amerlanerpaat taasinissamut periarfissaqartassapput.
Isumannaallisaanermut piumasaqaatit qaffasissut
Atortumik taama ittumik ineriartortitsineq ajornaatsuinnaanngilaq. Nunani tamalaani elektroniskimik allakkatigut taasinerni pitsaassuseq atorneqartartunut naleqquttuussaaq.
- Atortoq taama ittoq isumannaallisarneqarnera qaffasittussaavoq, pappilissamik aqerluusamillu taasinermut tunngaviusut malinneqartussaammata. Tassa imaappoq, allakkatigut taasineq isertuussaassaaq kiisalu imminnut taasoqarsinnaassanngilaq, Søren Hald Møller oqarpoq.
Allakkatigut taasinerinnarmut atortoq
Digitalinngorsaanermut periusissiamut aningaaasaliissutinit atortup ineriartortinnissaanut 400.000 koruunit Naalakkersuisut atorniarpaat. 2020-mit ukiunilu sisamani tulliuttuni Qinersisarneq pillugu aalajangiisartut allattoqarfiata annertusarneqarneranut 600.000 koruunit atorneqassapput. Tamatuma saniatigut allakkatigut taasisarnernut akisussaaffik kommuninit Qinersisarneq pillugu aalajangiisartunut nuunneqassaaq.
- Tamanna pisaariitsuunngilaq, tassami isumannaallisaaneq akiginiannginnatsigu.
Elektroniskimik allakkatigut taasinissamut kisimi systemi ammaassisassaaq.
Ullormi qinersiffiusumi taasigaanni, pappilissamik, aqerluusamik aamma taasinermik ikioraavinni suli pisassaaq.