Hans Egedep eqqaassutissaa alla aamma serlersaaffigineqarsimavoq
Hans Egedep eqqaassutissaa Københavnip qeqqani Marmorkirkenip silataaniittoq marlunngormat unnuakkut qalipaamik aappaluttumik kuerarneqarsimavoq, soorlu aamma Nuummi ullut qulingiluat matuma siorna eqqaassutissat taamak pineqarsimasoq.
Hans Egedep eqqaassutissat serlersaariffigineqarsimanera Københavnimi Politiit uppernarsarpaat, politiit Sermitsiaq.AG-p tusarsimasaa ilumoornersoq uppernarsarniarlugu eqqaassutissaq takuniarsimavaat.
Københavns Politiit Sermitsiaq.AG-mut ilisimatitsissutigaat, Hans Egedep eqqaassutissaa Marmorkirkenip silataaniittoq marlunngornermi unnuakut danskit nalunaaqutaat malillugu marlunngornermi unnuakkut, qaliapammik aappaluttumik "docolonize"-mik allaffigineqarsimasoq. Eqqaassutissarli qalipaammik aappaluttumik serlersaarfigineqarsimanersoq politiit ilisimatitsissutigerusunngilaat, suliaq ulloq unnuarlu nalunaarusianut suli ilanngunneqarsimanngimat.
- Suliaq serlersaarisimasutut misissuiffigineqassaaq, Københavnimi Politiit ilisimatitsipput, kina serlersaarisimanersoq paasiniarlugu taakku maanna misissuillutik aallartissimapput.
Oqallisaaqisoq
Ajoqersuisup danskinit-norskinit kingoqqisup eqqaassutissaa Nuummi juunip 21-ani inuiattut ullorsiornermi serlersaarfigineqarmat oqallittoqarsimaqaaq, eqqaassutissallu maanna inissisimaneranut akerliusut illersuisullu atsiornernik katersuilersimallutik.
Kommuneqarfik Sermersuumi borgmesterip Charlotte Ludvigsenip, eqqaassutip qanoq pineqarnissaa paasiniarlugu innuttaasut peqataatinneqassasut ilisimatitsissutigisimavaa, inuitilaasa siunnersuutigisimavaat eqqaassutissaq Nunatta Katersugaasivianut oqaluffimmulluunniit inissinneqassasoq. Allat siunnersuutigisimagaat kangerlummi imaanut kivisinneqassasoq.
Eqqaassutissat arlallit
Marmorkirkenip ilisimaneqaatigaa, Danmarkimi ilagiit oqaluttuassartaanni inuit ilisimaneqarluartut eqqaassutissaannik arlalinnik peqarnini. Hans Egedep taamaalilluni, assersuutigalugit Grundtvig, Brorson, Kingo, Ingemannilu tassani peqatigai. Mamorkirkenip aamma Frederiks Kirkemik taaneqartartup ilataani Søren Kirkegaard, Ansgar, Knud den Hellige Hans Tausenilli eqqaassutissaqarput.
Nunarsuarmi tamarmik akerliussutsimik sapaatip akunnerini kingullerni takutitseqattaartut eqqaassutissanik, aamma qernertumik amillip George Floydip maajip 25-ani Minneapolisimi peqqarniitsumik tigusaanermini toqutaaneranut atatillugu eqqaassutissanik inussiaateqarsimanermut attuumassutilinnik aserorterisajoorput.