Egede tunngaviusumik inatsisissaq pillugu: Alloriaqqinnissaq pingaaruteqarpoq
Naalakkersuisut siulittaasuata nunatta tunngaviusumik inatsisissaanut missingiutip takunissaa pissanganartippaa. Suliap ingerlanerata nanginneqarnissaa maanna pingaarnersaasoq, taassuma oqaatigaa, taamaalilluni tunngaviusumik inatsit Kalaallit Nunaata siunissaanut tunngaviussammat.
Inatsit tunngaviusussaq pillugu Isumasioqatigiissitat ukiut pingasut sinnerlugit sulereerlutik, Kalaallit Nunaata siunissami naalagaaffittut namminersortunngornissaanut tunngaviusumik inatsisissaanut siunnersuut qaammatit marluk qaangiuppata saqqummiutissavaat. Naalakkersuisut siulittaasuata Múte B. Egedep inernera pissanganartippaa.
- Tunngaviusumik inatsisissamut missingiummut siamasissumik isumaqataasoqarnera pissutigalugu siunissami atorneqarnissaa neriuutigaara. Kalaallit Nunaatami namminiilivinnissaa anguniagaavoq. Qaqugu piumaarnersoq isumaqatigiissutigineqannginneruvoq.
Namminiilivinnissaq pillugu sulinermi tunngaviusumik inatsisissatut siunnersuut allannguiumaarnersoq Múte B. Egedep oqaaseqarfigerusunngilaa.
- Naalagaaffik namminersortunngorniaraanni nunap tunngaviusumik inatsiseqarnera tunngaviusarpoq, taamaattumik isumasioqatigiissitat pilersinneqarput.
Tunngaviusumik inatsimmut missingiut naak taarseraattoqarneranik aamma corona pissutigalugu kinguaattoornernik aammalu siulittaasuusimasup Kuupik Kleistip qaammatini pingasuinnarni siulittaasooreerluni tunuarnerata kingorna 1. april naammassereertussaavoq.
Tunniunnissaanut piffissanngortoq
Isumasioqatigiissitani suleqatigiinniarnermi ajornartorsiuteqartoqarneranik pissuteqartinneqarpoq. Suliarli maanna naammassissaaq, Múte B. Egede naqissusiivoq.
- Isumasioqatigiissitat ukiuni arlalinni sulipput, suliarlu pillugu oqallittoqarnikuuvoq. Maanna tullianik alloriarnissaq Naalakkersuisut pingaartippaat. Aningaasat sinneruttut atorlugit isumasioqatigiissitat kvartalip missaani sivisussusilimmik sulisinnaasimapput. Taamaammat apriilimi tunniunneqassaaq.
Isumasioqatigiissitat 2021-mi allanngortinneqarput, tassani ilaatigut innuttaasut peqataatinneqarnissaannik piumasaqaat peerneqarpoq. Naalakkersuisut siulittaasuata oqarnera naapertorlugu suliat ingerlalertornissaannik tamanna pissuteqarpoq.
- Suliap naammassinissaa qulakkeerniarlugu taama pisoqarpoq, tunngaviusumik inatsisissaq isumaliutissiinissarlu ukkatarineqarlutik. Missingiutip Inatsisartuni suliarineqarnissaa tullinnguuppoq, taakkulu suliareqqinneqarnissaa aamma innuttaasut peqataatinneqarnissaat paasiniassavaat.
Ilaasortaatitat ilaasortanngorteqqinneqarsinnaasut
Tunniunneqarnissaanut piffissarititap saniatigut isumasioqatigiissitat ilaasortaatitat arfinillit suliunnaarsippai, taakku manna tikillugu suleqataanikuupput, suliap pisortatigut 31. december ilanngullugu akuerineqarnikuummat. Taanna aalajangerneq isumasioqatigiissitani siulittaasup Ineqi Kielsenip nuannarinngilaa.
- Peqataasinnaannginnerat uggornarpoq, tassami isumasioqatigiissitaq pillugu ilisimasaqarput. Arlallit allattoqarfimmit ilaasortaniillu sivisunerusumik ilaasortaapput. Nunatsinni ingerlatsineq aamma inatsisit ineriartornerannik annertuumik ilisimasaqarlutillu misilittagaqarput.
Kisianni tamanna nammineq allanngortissinnaavaa, Múte B. Egede oqarpoq.
- Siulittaasup isumasioqatigiissitamiittullu allat sulinerup sinnera aningaasat atorneqarsinnaasut atorlugit pilersaarusiortussaapput. Anguniakkap qanoq angunissaa nammineq aalajangigassaraat. Suliap Inatsisartut piumasaqarnerat malillugu tunniunneqarnissaa uagutsinnut pingaarnerpaavoq.