Hans Egede pillugu oqallinneq kommunalbestyrelsep naggaserpaa
Kommuneqarfik Sermersuumi kommunalbestyrelsep Hans Egedep eqqaassutissaa inissisimaffimminiiginnassanersoq pillugu oqallinneq ullumi naggaserlugu ataatsimiissapput.
Digitaliusumik taasititsisoqareersoq, allakkatigut taasititsisoqareersoq, titartakkanik nassiussisoqareersoq, innuttaasunik ataatsimiisitsisoqareersoq politikkikkullu oqallittoqangaatsiareersoq, Hans Egedep eqqaassutissaa inissisimaffimminit nuunneqassanersoq pillugu oqallinneq naggaserlugu kommunimi ataatsimiissutigineqalerpoq - maannakkumuugallartoq.
Sermitsiaq.AG-p siusinnerusukkut allaaserisimavaa Hans Egedep eqqaassutissaa oqallisaasaqisoq iniminiiginnartussanngortoq.
Kommuneqarfik Sermersuumi kommunalbestyrelse ullumi nalunaaqutaq 15.30 ataatsimiissapput.
Tassani politikkikkut siunnersuuteqartoqarsinnaavoq, Hans Egedep eqqaassutissaata peerneqarnissaa pillugu, periarfissarli atorneqarsimanngitsoq borgmesteri ilisimatitsivoq.
Nuummi innuttaasut 1.649-ttaasititsinermut peqataapput. Innuttaasut 1023-t Hans Egedep eqqaassutissaa iniminiiginnassasoq taasipput, 626-llu eqqaassutissap nuunneqarnissaanut taasillutik.
- Hans Egedep nuunneqarnissaanut taasinermi amerlanerussuteqartoqarsimassagaluarpat suliaqarneq immikkoortumik ataatsimik ilaneqarsimassagaluarpoq, tassani innuttaasut eqqaassutissap inissisimaffissaanik isummersortinneqarsimassagaluarlutik kiisalu qaqqap qaava sumut allamut atorneqassanersoq isummersortinneqarlutik. Immikkoortorli taanna sulinermi atorunnaarsinneqarpoq eqqaassutissap nuunneqarnissaanut akerliusut amerlanerussuteqarmata, kommunalbestyrelsemut ilisimatitsissutini ullumi eqqartorneqartussani allassimavoq.
Kommunilli naatsorsuutigaa tamat oqallinnerat ingerlaannarallassasoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...