Efterskolimi atuartunut aallarneq ajulertunut ikiorsiineq
Kalaallit efterskolimi atuartut 50-it Danmarkimit aallarsinnaanngitsut, Galtrup Efterskolemi Morsimi atuarnermi nanginnissaanut maanna neqeroorfigineqarlutik ikiorserneqarput, taanna kalaallinut inuusuttunuinnaq ammatinneqarpoq.
Morsimi Galtrup Efterskole danskit efterskoliini kisiartaalluni kalaallinik efterskolimi atuartunik, Danmarkimit ingerlariaqqinnaveertunik atuartuuteqarsinnaavoq. Efterskolit sinneri danskit coronamut killilersuinerat pissutigalugu matoqqatinneqarput.
Efterskoleforeningen, Namminersorlutik Oqartussat, Kalaallit Illuutaat aamma Galtrup Efterskole tallimanngormat kalaallinut efterskolimi atuartunut ikiorsiissummut pilersaarusiupallapput, taakku corona pissutigalugu danskit efterskoliisa maannamuugallartoq 7. februaarip tungaanut matoqqaneranni immikkut ittumik inissisimalerput.
Qiimasut
Kalaallit efterskolimi atuartut 35-t ullumikkut Galtrup Efterskolimiipput, tassani oqaatsinik ilinniartinneqarput, faaginik toqqakkamminik atuartarput aamma ikinngutitik nuannisaqatigisarlugit. Illuanik danskit atuartut 80-it angerlarsimatinneqarput, ungasianiit ilinniartinneqarlutik.
- Atuartut qiimasorujussuupput. Aap, nuannisarput, tassanngaannarlu inissanerujussuarnerput iluarisorujussuuaat, forstanderi Jens Hvid Skouboe oqarpoq, taassuma kalaallit efterskolertut ukiuni kingullerni immikkut ukkatarai.
Kalaallit atuartut ilaat tassanngaannaq danskit corona pillugu juulli sioqqutilaarlugu matusinerannut, qanittukkullu sivitsorneqarnerannut tunngatillugu saaffissaarussimasut, taassuma nassuiarpaa.
Efterskolit juullimi atuanngiffeqarnermi matoqqapput, atuartullu Kalaallit Nunaannut atuanngiffeqarlutik aallanngikkunik, Danmarkimi ilaqutariinnut attaveqarfigisaminniikkajuttarput. Matusineq sivitsorneqarmat ajornartorsiut annertunerulerpoq, ilaqutariillu attaveqarfiusut pilersaarutaasumit sapaatip-akunnerini amerlanerusunut efterskolertut ilagisariaqalerpaat, tamannalu ilaannut attanneqarsinnaanngilaq.
- Uani weekendimi kalaallit marluk atuartut maanngarteqqammerpakka, maanna atuartuutigut 35-upput. Amerlanerusunullu inissaqarpugut, forstanderi oqaluttuarpoq, taanna kalaallinik atuartuuteqarnermik misilittagaqarluarlunilu iluatsitsilluarpoq.
Angalanermut aningaasartuutit akilerneqarput
Tamatuma saniatigut taanna efterskolimi coronamik tunillaassuuttoqarnissaanut ernumassuteqanngilaq, kikkut tamarmik efterskolimut isertinneqannginnerminni misissorneqaqqaartussaammata, tassanilu tunillaassuuttoqannginnissaanut maleruagassat tamarmik malinneqarput.
Danmarkimi ilaqutariinnut attaveqarfinni ingerlariaqqinnaveeraanni aammalu efterskolerneq Morsimi nangeqqikkusukkaanni, efterskoleforening imaluunniit Kalaallit Illuutaasa ilaat attaveqarfigineqassasoq, forstanderi ilisimatitsivoq. Saniatigut akiliisoqassanngilaq, efterskolip matoqqasup aamma Galtrup Efterskolep akornanni isumaqatigiissuteqartoqarsimammat.
Efterskolimi atuartut Galtrup Efterskolemukarusuttut, angalanermut aningaasartuutaat akilerneqarumaartut, Lis Brok Jørgensen Efterskolernemeersoq ilisimatitsivoq.
Akerlianik Galtrup Efterskole atuartunik ullumikkut Kalaallit Nunaanniittunik tikisitsinissamut periarfissaqanngilaq.
Kalaallit immikkut ukkatarineqartut
Galtrup Efterskole kalaallimik ilinniartitsisoqarnermigut oqaatsinik ilinniartitsinermik pilersitsivoq, kalaallinut meeqqanut ilinniarnertuunngorniarfimmi inuussutissarsiornermilluunniit ilinnialinnginnermi danskisut oqaatsiminnik nukittorsaarusuttunut toqqaannartumik tulluarsakkamik.
- Klassinik kalaaliinnarnik atuartulinnik pilersitsinikuuvugut. Taamaalilluta atuartitsineq tulluarsarsimavarput, tamannalu toqqissisimanerunermik ilinniartitsilluarnerunermillu pilersitsivoq, Jens Hvid Skouboe, suliniuteqarnermigut atuarnermik unitsitsiinnartartunik appartitsisimasoq taama ilisimatitsivoq.