Efterskolet aamma atuarunnaartarneq: Danmarkimi atuartuuneq ilungersunaqaaq
Efterskolini atuartut Danmarkimit angerlaannartarnerat oqallisigineqartillugu, kulturikkut assigiinngissutsit pissutaanerarnissaat ajornannginaarineruallaartoq, Ilisimatusarfimmi ilinniartitsisoq isumaqarpoq.
Kalaallit efterskolini atuartut atuarunnaartarnerat oqallisigineqartillugu, inooqataanikkut tarnikkullu ilungersunartorsiortoqartarnera, Line Grothip Ilisimatusarfimmeersup isumaqatigaa, isumaqarlunili ajornartorsiutigineqartartut assigiinngiiaarnerujussuusartut.
Aviisi AG taama allappoq.
- Kalaallit atuartut oqaatigilluaannarlugu »ajornartorsiutitut« inissisimanerusut takusinnaavara. Atuartut Danmarkimi efterskolernissaminnut piareersarluarsimasanngitsut, nalinginnaasumik isumaqartoqarpoq. Aamma kulturikkut assigiinngissutsinut qallunaallu oqaasiinut sungiussiniarnertik ilungersunartorsiutigisarlugu. Kalaallit efterskolertut sungiussiumaataartarnerannut atuarunnaartarnerannullu patsisaasut, ingerlaannartumik atuartunut ataasiakkanut tutsinnissaat, isumaqarpunga mianersuutigisariaqaripput, taanna oqarpoq.
Kalaallit Danmarkimi efterskolertut atuarunnaartartut qassiunerat, aviisip AG-p sapaatip akunnerani kingullermi saqqummiuppaa. Ukiumi atuarfiusumi matumani 2022/23-mi inuusuttuaqqat 238-t Danmarkimi efterskolernissaminnut Namminersorlutik Oqartussanit tapiiffigineqarput. Taakkunannga 15-it angerlareerput, taakku 6 procentiupput. Siorna inuusuttuaqqat 167-it ukiumi ataatsimi efterskolernissartik toqqarpaat, taakkunannga 27-t ukioq atuarfiusoq naanngitsoq angerlaannarput.
Line Groth kalaallit atuartut Danmarkimi efterskolertut ukioq atuarfiusoq qiteqqutiinnartoq atuarunnaartarnerannut patsisaasartunut immikkut ilisimatusarsimavoq.
Aviisimi AG-mi atuarnerusinnaavutit. Aviisi uani pissarsiariuk: