Efterskoleni atuartut Danmarkimut utersinnaanngorput

Danmarkimi ilinniartoqarfiit arlallit, soorlu efterskolet inuussutissarsiutitigullu ilinniarfiit piffissami qaninnermit ammaqqinneqalerput, taamaalillutik atuartut Danmarkimut angalaqqissinnaanngussapput, Namminersorlutik Oqartussanit ilisimatitsissutigineqarpoq.

Danmarkimi ilinniartoqarfiit arlallit, efterskolet ilanngullugit, ataasinngormpat maajip 18-aini ammaqqinneqassapput:

- assa imaappoq Kalaallit Nunaanni atuartut ilinniartullu pisariaqarpat Danmarkimukarlutik soraarummeeriartorsinnaalersut, Namminersorlutik Oqartussat tusagassiorfinnut nalunaaruteqarnerminni allapput.

Kalaallit efterskoleni atuartut 130-t missaanniittut taamaalillutik Danmarkimi atuarfiminnut utersinnaanngorput, tassa kissaatigigunikku - atuarnertik naggaseriartorlugu utersinnaanngorput.

Namminersorlutik Oqartussat ilitsersuutaat

Kalaallit Nunaanni atuartunut, lærlinginut ilinniartunullu – atuarfinnut, Majoriamut ilinniarfigisannulluunniit saaffiginnigit.

Atuartunut nunamut allamut ilinniariarsimasunut imaluunniit efterskolimi atuartunut Danmarkimi efterskoleni atuartunut – efterskolit saaffigeqqaaruk ammaaqqinnissamullu paasissutissanik pissarsillutit. Kingorna efterskolit pillugit aqutsisoqarfimmut ugguuna efterskole@nanoq.gl oqarasuaatikkulluunniit ugguuna +299 346755 imal. +299 346754 attaveqarit.

Kalaallit Nunaata avataani atuartunut, lærlingenut ilinniartunullu allanut – Danmarkimi najukkanni kalaallit illuannut saaffiginnigit. https://www.groenlandskehuse.dk-mut attavissarsiorit Majorialluunniit angalanissarnut sullittarpatit paasiniaaffigiuk .
Danmarkimi højskolini atuartut Majoriamut attaveqassapput. Majoriap angerlarnissannut qinnutissavaatit. Nalornisoqarpat Majoriaq Grønlandsk Center for Danske Højskoler-mut e-mailimut hojskole@nanoq.gl-mut attaveqartoqarsinnaavoq.

Pissarsiffik: Naalakkersuisut.gl

Namminersorlutik Oqartussanit eqqumaffigeqquneqarpoq, ilinniartoqarfiit efterskolellu ataasiakkaat akornanni ullut ammaaqqiffiusussat assigiinngissinnaasut:

- Taamaammat kaammattuutigineqarpoq qaqugukkut ammaasoqarniarneranut tunngasut qaqugukkullu allartoqarsinnaanersoq paasiniarlugit atuarfigisaq ilinniarfigisarluunniit attavigineqassasoq , Namminersorlutik Oqartussat allapput, nangillutillu:

Billetsinik nammineerluni inniminniisoqannginnissaa inassutigineqartoq

- Kingorna angalanissamut, siunnersorneqarnissani inniminniinissanilu ilinniarfigisaq nalinginnaasumik inniminniiffigisartagaq attavigineqassaaq. Billetsinik nammineerluni inniminniisoqannginnissaa inassutigineqarpoq, tamannali ilinniarfigisaq aqqutigalugu pissasoq kaammattuutigineqarluni .

Efterskolenut tunngatillugu immikkut eqqarsaatigineqassaaq, Danmarkimi efterskolit peqatigiiffiata Meeqqat atuartitaanerlu pillugit ministeriaqarfik aamma Peqqissutsimut aqutsisoqarfik ataatsimeeqatigai efterskolinilu atuartitaaneq, atuanngiffeqarneq, nerisaqarneq ineqarnerlu pillugit pissutsit immikkut ittut eqqartorlugit.

Atuartut uteqqinnissaannut tunngatillugu efterskolit qanoq aaqqissuussillutik ammaqqikkiartornissaannut ilitsersuut kingusinnerpaamik pingasunngornermi tunniunneqarnissaa efterskolit peqatigiiffiata naatsorsuutigaa .

Powered by Labrador CMS