Skip to main content

Dubaimi ataatsimeersuarnermi issittumi nunap inoqqaavi sinnerlugit Miyuki oqalugiarpoq

Silap pissusaa pillugu nunat tamalaat ataatsimeersuarneranni, COP18-imi Dubaimi ingerlanneqartumi, sapaammi Arctic Day inerlanneqarmat, Miyuki Daorana oqalugiartut ilagaat.

ICC Samit peqatigalugit Dubaimi COP28-p ingerlanneqarneranut atatillugu sapaammi Arctic Dayimik aaqqissuisuupput.

Issittoq pillugu ulloritinneqartoq Indigenous Peoples’ Pavilionimi COP28-mut atatillugu ataatsimiittarfimmiittumi ingerlanneqarpoq, Issittumilu silap pissusiata allanngoriartornera pillugu oqallinnernik arlalinnik imaqarluni.

Kalaaleq filmiliornermik suliaqartup Inuk Jørgensenip silap allanngoriartornera pillugu filmeeraliaa takutinneqaqqaarpoq, Inuillu ilisimatusarnerni peqataatinneqarnissaat, kiisalu Pikialasorsuaq pillugu sulineq pillugit saqqummiussisoqartoq ICC-p nunat tamalaani siulittaasuat, Sara Olsvig, Sermitsiaq.AG-mut ilisimatitsivoq.

COP28-mi ICC 15-inik aallartitaqarpoq, taakkunannga arfinillit inuusuttuullutik.

- Inuuneq toqulu

Miyuki Qiajunnguaq Daorana Avanersuarmeersoq maannali Nuummi najugaqartoq Nunatsinniit Arctic Dayimi peqataasunut ilaavoq.

Taanna Sermitsiaq.AG-mut oqaluttuarpoq Arctic Dayimi nunap inoqqaavisa pisinnaatitaaffii, inooriaasaat pinngortitamullu ataqqinninneq pillugit oqalugiarsimalluni.

- Nunap inoqqaavisa ilisimasaat, nunarsuarmut isiginnittariaasiat inuunermilu naleqartitaat silap nalimmassarluarneranik aallaaveqarput. Silap pissusaata allanngoriartornerata ulorianarluinnarnera annertuvoq. Inuuneq toquluunniit tassani pineqarput. Inunnuinnaanngitsoq, aammali uumasoqatigiinnut, pinngortitamut kulturimullu, oqarpoq nangillunilu.

- Taamaammat kinguaariit ilisimasaat, ilaquttannit, ikinngutinnit ilinniarfinnillu aamma ilisimasakka saqqummiutissallugit uannut isumalerujussuuvoq. Pingaartippara Avanersuarmiut tusaaneqarnissarput, uagummi taakkuuuvugut Kalaallit Nunaanni kultuikkut, aningaasaqarnikkut politikkikkullu kingulliunneqartuartut, illoqarfiit annerit inoqarfiillu minnerit akornanni naligiinnginneq pissutigalugu.

Olsvig: Aqqutit avissaarfianniippugut

- Uagut Inughuit taakkutuaannanngulerpugut siuaatta inooriaasiannik ingerlatsisut, soorlu qajartorluni qimusserlunilu piniarnerit eqqarsaatigalugit. Silap pissusiata ulorianartumik allanngoriartornera nunarsuarmi tamarmi minnerpaaffissaminiitinniarneqartariaqarpoq, Miyuki Daorana oqarpoq.

Dubaimi COP28-p ingerlanneqarnerani issittup immikkut sammineqarnera pingaaruteqarluinnartoq, Sara Olsvig oqaaseqarpoq.

- Killiffipput pillugu allannguilluinnartoqarpoq. Nunarsuarmi suliffissuarnik peqalertinnagu pissutsinut sanilliullugu silaannaap kissatsikkiartornerata 1,5 gradimik qaangiinnginnissaa pillugu Parisimit Isumaqatigiissummi anguniagaasoq angujuminaalligaluttuinnarpoq, 2023-mi silaannaap kissakkiartornera 1,4 gradinngoreermat, Issittumilu 2020-mi 2,2 gradinngoreersimalluni, Sara Olsvig oqarpoq nangillunilu:

- Immap qaffakkiartornera, sikusarnerata allanngornera piffiillu ilaanni sinerissat nungukkiartornerat naggueqatigiit inunnut Inuillu Nunaannut sunniuteqarujussuareerput. COP28-mi tigussaasunik angusaqarnissaq, nunarsuarmioqatigiillu nunat inoqqaavisa atugaat puigornagit suliaqarnissaaat, taamaammat pingaaruteqarluinnarpoq. Nunat inoqqaavi allat peqatigalugit pisinnaatitaaffitta inuillu pisinnaatitaaffiissa COP28-mit isumaqatigiissutigineqartussami ilanngunneqarnissaat sukataarutigaarput.

COP28-p ingerlanneqarnerani ICC aaqqissuussamut allamut ataasinngornermi aamma aaqqissuusseqataasuussaaq. Tassani Indigenous Climate Leadership ingerlanneqassaaq. ICC-p siulittaasua Sara Olsvig COP28-mut sapaatip akunnerani tassani peqataajartorluni tikissaaq, canadamiut nunatsinnilu silap pissusaa pillugu naalakkersuisut aaqqissuussani peqataaffigisaani ilaassalluni, sammineqassallutik danskit pavilloiani immap avatangiisaa, Issittumilu plastikkinik mingutsitsineq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER