DTU: Inissianik iluarsartuussineq milliardinik akeqassaaq
Kalaallit Nunaanni inissiat affaat iluarsaanneqartariaqartut, DTU-mi lektori, Tove Lading, naliliivoq. Issittumi sanaartorneq pillugu ataatsimeersuarnermit, Kunngissap Frederiup aamma peqataaffigisaanit, ilanngutassiaq
Igalaat ussiitsut, oquk, betonngi qulloortoq, majuartarfeqarfiit allattuiffigineqarsimasut. Inissianik iluarsaassinissamik pisaraiqartitsinerup annertussusaa ernumaammernartuuvoq, aviisi AG taama allaaserisaqarpoq.
Danmarks Tekniske Universitetimi, sanaartornermut ilisimatusarfimmi, Institut for Byggeri og Anlægimi, lektori Tove Lading, naliliivoq, tamanna 12 milliarder koruuninik akeqassasoq. Missingiinikkummi Kalaallit Nunaanni inissiat affaat iluarsaanneqartariaqartut isumaqarpoq.
Ajornartorsiut kinguartinneqartoq
- Missingiineq taqamueriaaffiusorujussuuvoq. Immaqa 6, 12 imaluunniit 18 milliarder koruuninik akeqassaaq. Pingaarnerpaavoq iluarsaassinissamut pisariaqartitsinerup annertoorujussuunera. Tamannalu ajornartorsiutip kinguartittarneratigut piffissap ingerlanerani annikinnerulernavianngilaq. Inissiat ilaannik isaterisoqassaaq, allanillu iluarsaassisoqassalluni. Siunissamut ungasissumut aaqqiissutissat ukiunut 20-30-nut tunngasut pisariaqartinneqarput, Tove Lading oqarpoq.
Danmarkimi Kalaallit Nunaannilu sanaartukkanik illuarsaassinermut tunngasunik ukiuni 30-ni suliaqarsimavoq, isumaqarlunilu, maani nunami inissiaatitsinnut 23.000-inut ataatsimoortumik pilersaarusiornissamut piffissanngortoq.
Inissiat silap pissusiani peqqarniitsumi nungullariartuinnartanngillat. Aamma inuit nutseqattaartorujussuusarnerannit sunnerneqartarput. Tove Lading naapertorlugu 40 procentit ukiut tamaasa inissiamut allamut nuuttarput, Danmarkimut sanilliullugu marloriaammik amerlanerusut.
Allaaserisaq tamaat atuaruk, inissiallu iluarsaanneqarnissaminnut pisariaqartitsingajalernersut nassuiaataat paasillugit. Aviisimut AG-mut uani isissutissarsigit: