Skip to main content

D: Sisorarfinnut tusaaniarpallaartoqarsimanngilaq

Demokraatineersup Randi Vestergaard Evaldsenip kommunip siumut takorluuisinnaanerunissaa siunissamullu ungasinnerusumut pilersaarusiorsinnaanissaa kissaatigaa

Kommunalbestyrelsi Sisorarfiit siulersuisuinut immaqa tusaaniarpallaarsimanngitsoq, Randi Vestergaard Evaldsenip nassuerutigaa. Taamaattumik Nuummi ukiuunerani timersornikkut periarfissat pitsaanerulersinnissaannut ammasumik oqaloqatigiittoqarnissaa kajumissaarutigaa.   

Peqqissuseq pinaveersaartitsinerlu  
Randi Vestergaard Evaldsenip peroriartornermini ukiup qaammataasa qaamasalernerini pinngortitamiissinnaanerup aamma atortorissaarutinik pitsaasunik atuisinnaanerup qanoq pingaaruteqartiginerat nammineerluni malugilluarsimavaa. Taassuma tikkuarpaa tamanna nuannisarnissaannarmut tunngassuteqanngimmat, aammali pinaveersaartitsinermut, peqqissutsimut ilaqutariittullu inuunermut pingaaruteqarmat.  

- Pissutsit pitsaanerugaangata innuttaasut amerlanerusut silami sammisaqarlutillu aallusserusuttarput. Pissutsit sapinngisamik pitsaasuunissaannut Sisorarfiit pingaarutilimmik inissisimapput, kommunalbestyrelsimut ilaasortaq Randi Vestergaard Evaldsen oqarpoq.
 
Isumassarsiortoqarli 
Illoqarfimmi atortorissaarutinik nutarterinermi siunissamut ungasinnerusumut sapiissuseqarlunilu suliniuteqarnissaq pingaaruteqartut, Randi Vestergaard Evaldsen isumaqarpoq. Maani najugaqartut takornariallu eqqarsaatigalugit illoqarfitta qanittuani periarfissat pitsaasorpassuit suunersut eqqarsaatigineqartariaqarput. Assersuutigalugu taavaa illoqarfimmi ukiuunerani timersornikkut sammisassat Quassussuup Tunuanut nuunneqartuuppata periarfissarpassuaqassagaluartoq, tamaanimi nunap ilaa periarfissanik nutaarluinnarnik pilerinartunillu ammaassissagaluarmat. 

- Quassussuup Tunuani aaqqiissuteqarnikkut akornusersorneqarani pitsaasunik ujakkaartarfiliortoqarsinnaavoq, ilungersunartunik sangusaartarfiliortoqarsinnaalluni assingusunillu aasakkut sammisaqartitsisoqarsinnaalluni. Inuussutissarsiutinik namminersorlutik ingerlataqartut tamaani caféliorsinnaapput, illuaraliorsinnaallutik soqutiginartunillu allanik suliniuteqarsinnaallutik. Isumassarsisinnaaneq kisimi killiliisuussaaq, Randi Vestergaard Evaldsen oqarpoq.

Annerusumik samminnittoqartariaqartoq  
Kommuni ingammik meeqqanut inuusuttuaqqanullu sammisitamik peqqinnartunik suliniuteqarpoq. Soorlu Sisorarfiit ingerlanneqarnerannut tapiissuteqartoqartarluni aamma inoqutigiinnut isertitakitsunut meeqqat sunngiffimmi sammisaqartitsinernut atugassaannik agguaasoqartarluni.

Tapiissummi tamatumani meeqqap peqatigiiffimmi, kommunimi nalunaarsorsimasumi, sammisaqartitsinernut peqataasinnaanissaannut 500 koruunit angullugit tapiisoqartarluni. Taamaakkaluartoq Randi Vestergaard Evaldsenip nassuerutigaa, kommuni Nuummi ukiuunerani timersornikkut ingerlatanut tapersersuinerusariaqartoq, inuimmi peqqissuunissaannut pingaaruteqarmat. 
 
Pingaarnersiuinissamut sapiissuseqarnissaq  
Randi Vestergaard Evaldsen isumaqarpoq, suliassat ilungersunartut ilagigaat ajornartorsiutinut pilersunut qamisaanermut aningaasat amerlavallaat atorneqartarnerat. Tamatumunnga taarsiullugu unikaallariarluni siunissamut ungasinnerusumut suleriaasissamik suliaqartoqartariaqarpoq aalajangiusimallugulu. Taassuma oqaatigaa, ajornartorsiutinik qamisaanernut kommunip aningaasaatai atupallanneqartartut taamalu siunissamut ungasinnerusumut missingersuusiornissaq periarfissaqartarani.  

- Sisorarfiit ikioqqullutik nillianerat uatsinnit politikerinit isiginngitsuusaarneqannginnissaa pingaaruteqarpoq, maani Nuummi siunissami ukiuunerani timersornikkut periarfissat nalorninartorsiortinneqassanngippata. Massakkut iliuuseqartoqanngippat uningaannartoqassaaq qamisarniagassatullu nutaatut inississalluni, Randi Vestergaard Evaldsen oqarpoq.

Oqaloqatigiinnissaq kajumissaarutigigaa  
Randi Vestergaard Evaldsenip oqaatigaa, nammineq Sisorarfiit siulersuisui naapinngisaannarsimallugit. Taassuma ilanngullugu oqaatigaa, naak ingerlatsinerup Aningaasaateqarfiup Sisorarfiit isumagisaata aamma kommunalbestyrelsip sulinerata immikkoortinnissaat pingaaruteqaraluartoq, pitsaasumik oqaloqatigiinnissaq pingaaruteqartoq, kommunip taamaalilluni aningaasaateqarfiup sulinissaanut killiliussat eqqortut pilersissinnaaniassammagit. Taamaattumik taassuma kajumissaarutigaa, kommunalbestyrelsip aamma Aningaasaateqarfiup Sisorarfiit siulersuisuisa ataatsimeeqatigiinnissaat, taamaalilluni siunissami ingerlatsinissap illoqarfimmiunut tamanut iluaqutaasumik qanoq qulakkeerneqarsinnaanera paaseqatigiissutigineqarniassammat.    

Siunissami Qinngorput qanoq takorloorpiuk?
Illoqarfiup ilaa Qinngorput qanoq isikkoqassava? Siunnersuuteqarit makitsinermullu peqataagit.
Uju partiip siulittaasuanut: Oqaloqatigiittarniaritsi
Sermersuumi kitaani Demokraatit siulittaasuata oqaaseqaataa Kommuneqarfik Sermersuumi Meeqqanut Ilaqutariinnullu Ataatsimiititami siulittaasuanut Uju Petersenimut annertuumik uissuummisitsivoq. Anna...
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

Seneste Ugeavis

SENESTE NUUK - NYHEDER