Dronninngi aasamut tikeraalersoq
Dronning Margrethe, Kunngip umiarsuaata Dannebrogip ukiumoortumik aasaakkut angalanerani Nunatsinnut juulip qaammataani tikissaaq
Dronning Margrethep ukiortaami oqalugiarami oqaatigaa, aasamut Kalaallit Nunaannukarnissani pilersaarutigalugu, ilaatigut Hans Egedep Illuerunnernut tikinneranit ukiut 300-unngortorsiorneqarnerata nalliussineqarnissaanut peqataajartorluni.
Kunnip umiarsuaata aasaanerani angalanissaanut pilersaarut piareersimavoq, Kalaallit Nunaat tikitassanut ilaavoq, soorlu aamma Savalimmiut ukioq manna Dronningimit tikeraarneqarniartoq.
- Juulip naaneranit aggustusip qaammataa ilanngullugu Kalaallit Nunaanniissaaq. Savalimmiunut Kalaallillu Nunaannut ullut tikiffissai piaartumik nalunaarutigineqassapput, Kunngikkormiut nittartagaatigut tusagassiorfinnut nalunaarummi taamatut allassimasoqarpoq.
Dronningi kingullermik 2015-imi Kalaallit Nunaanniippoq.
Nalliuttorsiutigineqarpallaassanngitsoq
Hans Egedep nalliuttorsiutigineqarnissaa naatsorsuutigisimasatut annertuallaassanngilaq. Kommunimmi nalliuttorsiornissamut aningaasat immikkoortissimasani siunertanut allanut atorneqassasut aalajangiussimavaa. Borgmesterip Charlotte Ludvigsenip ilisimatitsissutiginikuuaa, aningaasat illoqarfiup kusassarneqarneranut Nuullu tunngavilerneqarnerata 2028-mi malunnartinneqarnissaanut atorneqassasut.
Ataqqinartorsuaq Dronningi maajip sisamaani ullup-qeqqanut pisortatigoortumik Kunngip umiarsuaanut Dannebrogimut ikissaaq.
Dronningi ukioq manna angalanermini Sønderjyllandimi Kattuteqqinnerup nalliuttorsiutigineqarnissaanut tikeraassaaq, Savalimmiunut Kalaallillu Nunaannut tikissaaq aasaaneranilu Thistedip, Esbjergip Fanøllu kommuniinut tikissalluni, Kunngikkormiut allapput.
2020-mi Covid-19 pissutigalugu Kunngip umiarsuaa Dannebrog angalasinnaasimanngilaq.