Dronningip tikeraarnissaa corona pissutigalugu kinguartinneqartoq

Nunatsinni tuniluuttoqarnera pissutigalugu, dronningip tikeraarnissaata kinguartinneqarnissaa Naalakkersuisunit qinnutigineqarsimavoq.

Dronning Margrethep juulip 24-aniit aggustip tallimaata tungaanut tikeraarnissaralua coronap malitsigisaanik kinguartinneqarpoq.

Kunngikkormiut tusagassiorfinnut nalunaaruteqarlutik ilisimatitsipput.

Tikerarnissap qaqugumut kinguartinneqarsimanera ilisimatitsissutigineqanngilaq.

Naalakkersuisut Siulittaasuat Múte B. Egede tassaavoq, tuniluuttoqarnera innersuussutigalugu dronningip tikeraarnissaata kinguartinneqarnissaanik qinnuiginnissimasoq.

Dronningi paasinnittoq

- Dronningip Kalaallit Nunaannut tikeraarnissap kinguartinneqartariaqarnera paasilluarsinnaavaa, kingusinnerusukkulli tikeraarnissani qilanaarivaa, kunngikkormiut tuagassiorfitsigut nalunaarutaanni atuarneqarsinnaavoq.

Ataasinngormat tusagassiortunik katersortitsinermi Múte B. Egede aperineqarpoq, Dronningip tikeraarnissaa illersorneqarsinnaanersoq, tassanilu erseqqissaatigineqarluni, dronningip tikeraarneranut atatillugu katersuunnissamut inerteqquteqarneq aamma atuuttariaqartoq, tikeraarnissaalumi maanna pisinnaanngikkallarpoq.

Savalimmiuniit angerlarsimasoq

Dronning Margrethe ulluni kingullerni pisortatigoortumik Savalimmiunut tikeraarpoq, ataasinngormallu Amalienborgimut utersimalluni.

Kunngikkormiut umiarsuaata "Dannebrogip" pilersaarut malillugu angallatigisassaralua motoorilunnera pissutigalugu timmisartumut ilaalluni Savalimmiunukarsimavoq.

Dronningip Kalaallit Nunaannukarnissaanut umiarsuaq aamma piareersimasussaanngitsoq ilisimaneqareersimavoq.

Dannebrog dronningip kunngikkormiullu allat pisortatigoortumik namminnerlu inuttut najugaqarfigisarpaat, tassa Danmarkimi aasaanerani angalanerminni imaluunniit imarpik ikaarlugu psiortatigoortumik tikeraaraangamik.

.

Powered by Labrador CMS