Dronningip tikeraarnerani pisoqarluartoq
Dronning Margrethe arfininngornermi Ilisimatusarfimmut pulaarlunilu Katuami nereqataavoq. Sapaammi pisussarpassuaqarpoq, ilaatigut kaffillertoqarluilu biskoppinngortitsisoqassaluni.
Dronning Margrethep Kalaallit Nunaannut ulluni tallimani tikeraarnera ingerlalluarpoq, sapaammilu Nuummi pisussarpassuaqarluni.
Dronningip ulloq aallarnerlugu Nunatta Katersugaasivia qulip-qeqqanut pulaassavaa. Kunngikkormiut Kalaallit Nunaannut tikeraaqqaarsimanerisa kiisalu Knud Rasmussenip tallimassaanik Thulemut ilisimasassarsiorsimanerata ukiut 100-t qaanngiunnerannut atatillugu katersugaasivimmut pulaassaaq.
Dronningip katersugaasivimiinnermini Cristianip qulingata 1921-mi tikeraarneranit Knud Rasmussenillu qimmussimik angalasimaneranit takussutissat assillu takusqarfigissavai.
Dronningi aqqarnup-qeqqanut Nunatta Katersugaasivianit pisuttuarluni Kunngi Christianip qulingata Dronning Alexandrinellu 1921-mi tikeraarneanni eqqaassutissaat alakkassavaa. Eqqaassutissap Nuutoqqamiittup saniani eqqaassutissaq dronningip qulaassavaa.
Tamatuma kingornatigut dronningi Kommuneqarfik Sermersuumi borgmesterimit Charlotte Ludvigsenimit kommunip allaffianut tikilluaqquneqassaaq, tassani Dronningip kommunalbestyrelsimi ilaasortat ilassissavai. Dronningi pulaarnermini ullup-qeqqasioqatigineqassaaq, tassanilu Nuummi illoqarfiup ineriartortinneqarneranut suliniut tusarfigissallugu.
Katuami kaffillerneq - kikkut tamarmik tikilluaqqusaapput
Dronningi nalunaaqutaq ataatsimut Paneeraq Siegstad Munkip Hans Egedep Oqaluffiani biskoppinngortinneqarneranut peqataassaaq.
Nalunaaqutarlu pingasunut Katuami kaffillertoqassalluni, tassani borgmesteri Charlotte Ludvigseni oqalugiarlunilu Kommuneqarfik Sermersuup dronningimut tunissutissaa tunniutissavaa. Kommuni nittartakkamigut allappoq, coronapassimik takutitsisinnaasut tamarmik dronningi peqatigiartorlugu kaffisoriarsinnaasut. Kaffillerneq pingasut-qeqqaniit tallimat tungaanut ingerlanneqassaaq.
Dronningi nalunaaqutaq sisamanut Hans Egedep Illorsuani tusagassiortunik katersortitsissaaq, ullorlu naggaserlugu Hotel Hans Egedemi arfineq-marlunut nereqatigiittoqassalluni. Biskoppi biskoppinngortitsinermut atatillugu pisortatigoortumik neqeraqatigiissitsissaaq.
Dronningip tikeraarnini tallimanngormat aallartippaa, tassani Ilulissanut tikikkami Kangiata Illorsua nutaaq pulaarlugulu kangianut angalluni takuniaavoq.
Arfininngornermi tikeraarneq aallarnerlugu issittumut ilisimasassarsiortartup Knud Rasmussenip Ilulissani inunngorfia pulaarpaa, nalunaaquttallu ataatsip missaani Nuummut tikilluni.