Dronningip Savalimmiunut tikeraarnissaa silarlummat kinguartinneqartoq
Dronningip timmisartua pingasunngormat Savalimmiuni silarlunnera pissutigalugu missinnaasimanngilaq, sisamanngorpalli tikinnissaa naatsorsuutigineqarpoq.
Savalimmiuni silarlummat Dronning Margrethep tikeraarnissaralua kinguartinneqarsimavoq.
Kunngikkormiut 'tusagassiisarfiat' taamatut ilisimatitsissuteqarpoq.
- Savalimmiuni Vága lufthavnimi silarlunnera pissutigalugu dronningip timmisartua ullmi missinnaasimanngilaq.
- Sila naatsorsorneqarpoq, dronningilli Savalimmiunut aqangu (sisamanngornermi) tikinnissaa naatsorsuutigineqarpoq. Soorunami aqangu tikeraarnerani pilersaarutit allanngortinneqassapput, kunngikkormiunit nalunaarutigineqarpoq.
Dronning Margrethe kunngikkormiup imaatigut angalasarnerisa ilaatut Savalimmiunut tikeraartussaavoq.
Kunngikkormiut umiarsuaata Dannebrogip pilersaarutit marlillugit dronningi Savalimmiuni naapittussaagaluarpaa, arfininngormalli umiarsuaq teknikkikkut ajornartorsiuteqalersimavoq.
Umiarsuaq marlunngornermi suli Flådestation Frederikshavnimiippoq. Qaqugorpiaq angalaqqilissanersoq suli ilisimaneqanngilaq.