Dronningimik naapitsinera: Kørestolertoq piffissaqarfigaa
Hermann Berthelsen, Siumut sinnerlugu Inatsisartunut ilaasortaq, Sisimiuni borgmesteriusimasoq, dronningimik naapitsisimanermi ilaannik matumani oqaluttuarpoq:
Inuit ilaasa pissusertik ataqqinassutigaat, inuillu tamakkua ilagaat Dronningi. Malunnarpoq inuit naapittakkani misigilluartarai – paasilluarlugillu. Kinaagaluarpalluunniit. Inuppalaartorujussuuvoq.
- Ilagalugu misigititsisut ilagaat oqaluuserisani ilisimalluartaramigit. Kalaallit Nunaat kalaallillu ilisimasaqarfigisorujussuuai.
- Eqqaamavara ilaanni Sisimiuni Kunngip Umiarsuaanut Dannebrogimut qaaqqusaagatta, ilagaarpullu kørestolertoq umiarsuarmi angalaarsinnaanngitsoq. Dronningip arnaq taanna majuartarfikkut majuarfigaa taannalu oqaloqatigalugulu nuannisaqatigaa. Tamanna aamma Dronningip pissusianik takutitsingaatsiarpoq.
- Kalaallit Nunaat namminiilivissagaluarpat isumaqarpit qallunaat kunngikkormiui kalaallillu atassuteqarnerat ingerlaannarumaartoq?
- Tamanna kinguaariit aggersut aalajangerumaarpaat. Tamanna siulittorsinnaanngilara siulittorumanngilaralu. Piffiimmi allanngorarput. Dronningili ataqqineqarpoq, Hermann Berthelsen akivoq.
Dronning Margrethe pillugu tapiliussaq tamaat atuaruk - akeqanngilaq.