Dronningi: Kalaallit Nunaanni ineriartorneq annertoorujussuuvoq
Dronning Margrethe nunatsinnut 1960-imi tikeraaqqaaramili arlaleriarluni tikeraartarsimavoq. Nunatta sukkasuumik ineriartornera tikeraartarnermini qanimut malugilluarsimavaa.
- Nassuiaruminaalluinnarpoq.
Dronning Margrethe nunatsinnut 1960-imi tikeraaqqaarnerminit maannamut tikeraartarnermini nunatta qanoq ineriartornera pillugu nassuiaaqquneqarami taama aallartilluni oqarpoq.
Qularnanngilluinnarpoq. Dronning Margrethep nunatsinni illoqarfiit alliartuinnartut misigisimavai. Nunatsinnut siullermik tikeraarami nunatsinni innuttaasut 32.500-t missaanniipput. Maanna nunarput 57.000 missaannik innuttaqarpoq.
- Tikeraaqqaarninniit ukiut 60-it qaangiutereerput. Nuuk illoqarferujussuanngorsimavoq, aammali illoqarfiit allat ineriartorlutillu anginerulersimapput, dronning Margrethe oqaluttuarpoq.
Takornariat tikerarnerulerput
Dronning Margrethep maluginiagaasa ilagaat takornariat nunatsinnut tikittartut amerlaneruleriartornerat. Ilulissanut Nuummullu tikeraarnerminut atatillugu sapaatiummat tusagassiortunik katersortitsigami taama oqaluttuarpoq.
- Takornariaqarnerulernikkut Kalaallit Nunaat inuppassuarnit allatut ilisimaneqalerpoq. Siornatigummi nunaasimavoq ilisimaneqarpianngitsoq tikinneqajuinnerusorlu, oqarpoq nangillunilu:
- Maannakkulli inuppassuit nunarsuup sinneranit Kalaallit Nunaannukartarput. Isumaqarpungalu tamanna naleqarluinnartoq, inuillu nunap immikkuullarilluinnarluni naleqassusianik innuttaasullu pitsaassusaannik takunnissinnaanerulertut, dronning Margrethe oqarpoq.
Kangiata Illorsua iluaqutaasussaq
Dronning Margrethe Ilulissaniinnermini Kangiata Illorsua tallimanngormat pulaarpaa.
Misigisani nuannaarutigaa, isumaqarlunilu Kangiata Illorsua Kalaallit Nunaannut iluatsitsinerusoq:
- Ilulissani tikeraarnera nuannerpoq. Kangiata Illorsua pulaarakku misigisat nuannernerit ilagaat. Aamma qanoq sananeqarsimanera, tassa ileqqunit allaanerusumik sananeqarsimanera, taamaattorli sumiiffimmut tulluartuulluinnarnera torrallataavoq, sermersuaqarfiullu qanoq ittuuneranik nassuiaasuulluarluni, Kangiata Illorsuanut pulaarnini pillugu oqaluttuarpoq.
Naatsorsuutigineqarpoq takornariat ukiumut tusintilikkaat Kangiata Illorsuanut takornariartassasut.