Dronningi Trumpip neqeroornera pillugu: - Niuertarfiunngilaq
Dronning Margrethe Nuummi Hans Egedep illuani sapaammi ualikkut tusagassiortunik katersortitsinermi amerikami præsidentiusimasup Trumpip nunatsinnik pisiariumanninnera pillugu oqaasertaliivoq.
- Eqqarsarpunga manna niuertarfiunngilaq!
Donald Trumpip 2019-imi nunatsinnik pisiarinnikkumalluni neqerooruteqarnera pillugu tusarami taama eqqarsarsimalluni, Dronning Margrethe naatsumik ersarissumilli oqarpoq.
Nunatsinni ullut tallimat tikeraarpoq. Nuummilu ullut marluk tikeraareerluni Hans Egedep illuani tusagassiortunit apersorneqarnermini taama oqarpoq.
Donald Trumpip Danmarkimut ukiut marluk matuma siorna pisortatigoortumik tikeraannginnermini taama tupaallannartigisumik neqerooruteqarpoq. Ministeriunerup Mette Frederiksenip neqeroorut ingerlaannartumik itigartippaa, isumassarsiarlu tulluannginnerarlugu. Taama pisoqareernerani Trumpip tikeraarnissani taamaatippaa.
Suleqatigiinnissaq neriuutigaa
Dronningi naalagaaffeqatigiinneq pillugu oqallittoqarsimaneranut kingullermut tunngassuteqartunik aamma aperineqarpoq. Kalaallit Nunaannik namminiilivinnissamik isummertunut qanoq oqarusunnersoq aperineqarami ima akivoq:
- Oqaloqatigingaarsinnaagunanngilakka, isumaqarami qanoq oqarusunnersunga soqutiginngikkaat. Politikerit tamanna isummerfigisussaavaat, dronningi oqarpoq.
Naalagaaffeqatigiinnerup piffissami kingullermi oqallisigineqarneranut tunngatillugu naalaffeqatigiit iluani suleqatigiilluarnissaanik neriuuteqarluni oqariartuuteqarpoq:
- Pingaaruteqarluinnarpoq suleqatigiinnitta ingerlatiinnarnissaa, taamatullu pingasuulluta ataqqeqatigiinnissarput, tamanna pingaartittorujussuuara. Tamanna aamma ersarissaqqippara ukioq manna, Savalimmiuniinninni, dronningi oqarpoq.
Katuarmi arfininngornermi unnukkut persuarsiortumik nereqatigiinnerup nalaani oqalugiarami ima oqarpoq:
- Neriuutigilluinnarpara kissaatigilluinnarlugulu naalagaaffeqatigiinnerput asseqanngitsoq Kalaallit Nunaanni, Savalimmiuni Danmarkimilu naleqarluinnartutut paasineqartassasoq.