Dronningip oqalugiaataa
Dronningi nunarput pillugu ima oqarpoq
Dronning Margrethep aamma Prins Henriup nunarput aasamut tikeraassavaat. Tamanna ukiortaami oqalugiaammini oqaluttuaraa. Dronning Margethep 43.-ssaanik ukiortaami oqalugiaata kalaallisut qallunaatullu atuaruk
- Maanna ukiutoqarpoq. Ukioq aliasuffiusimasoq nuannaarfiusimasorlu qaangiuppoq. Inuit amerlanerit pisimasut nuannersut eqqaamanerusarpaat. Allalli kingumut qiviarnerminni nuannerpallaanngitsut eqqaamanerussarlugit.
- Maannali aggerpoq ukioq nutaaq maannangaaq neriuuteqarfigisarput kissaateqarfigisarpullu. Erinarsuutit juullisiutitoqqat ilaat ima taallartaqarpoq ‘Kissaatigisannik tunissavakkit’; taamaattorli ilisimaqqissaarparput suna tamarmi oqitsuinnaanngitsoq. Ilami neriuuteqartaqaagut. Immaqami pitsaanerussaaq immitsinnut naatsorsuutigeqatigiittarutta.
Ataqqinartorsuup Dronning Margrethep ukiortaami oqalugiaatini, tv-kkut qallunaat nalunaaqutaat malillugu unnukkut arfinernut, aallarnerlugu taama oqalugiarpoq.
Ukioq manna oqalugiarnera Sjællandip avannaani Fredensborgip illussaarsuani ingerlanneqarpoq Københavnimi Amalienborgip nutarterneqarnerata kinguneranik.
Sermitsiaq.AG-p Ataqqinartorsuup Dronning Margrethep 2014-imi nunarput Savalimmiullu pillugu oqalugiaataani uku tigulaariffigivai:
‘Ukiumi qaangiutilersumi Kalaallit Nunaat naalakkersuinikkut sorsutassaqarsimaqaaq aningaasaqarnikkullu unamminartorsiorfiusimaqaluni. Ukioq ataasiinnaq qaangiussimalermat taamatut pisoqarnissaa naatsorsuutigineqarsimanngikkaluarpoq.
Tamatta neriuutigaarput ukioq nutaaq inuiaqatigiit kalaallit nutaamik aallartitsiffigiumaaraat. Naak ajornakusoorutit tamakku atuukkaluartut kalaallit uummammit qanilaassusiat qiimmanerallu allanngorsimanngilaq.
Tamanna erseqqarilluinnarpoq Kunngissakkut aasaq Kalaallit Nunaannut tikeraarneranni. Kunngissakkut tikeraarnerat nuannersumik misigisaqarfioqqissimavoq meeraallu puigunngisaannagassaminnik misigisaqarsimallutik Kalaallit Nunaannut uteqqiaffigisassaminnik.
Tikeraarnerat uagut angajoqqaatut aanakkutut aatakkutullu ungasianiit malinnaaffigisimavarput tamannalu uummatitsigut kissalaarnermik pissarsiaqarfigisimavarput. Kunngissakkut Kalaallit Nunaanni tikilluaqqusaasimanerat uanga uigalu Kalaallit Nunaanni kikkunnut tamanut qujassutigaarput.
Ukioq qaangiuttoq Savalimmiuni ajortunik misigisaqarfiusimanngilaq. Tamanna Savalimmiormiut suliniuteqarumatussusiannut nikallujaassusiannullu eqquisimanngilaq. Pinngortitap atugassarititai ilisimaaraat nunallu tamalaat piumasaqaatigisartagaat naammassilluarsinnaasarsimallugit.
Uigalu Savalimmiuni kikkut tamaasa aamma Kalaallit Nunaanni kikkut taamaasa uummammit pisumik inuulluaqquavavut ukiumullu nutaamut iserluarnissaannik kissaallugit. Aasamut ataatsimoorluta Savalimmiut aamma Kalaallit Nunaat tikeraassamaarpavut; tamanna qilanaareqaarput'.
Ataqqinartorsuup Dronning Margrethep qallunaatut oqalugiaataa, oqalugiaataatalu kalaallisuunngortinneqarnera allaaserisap talerpiata tungaani pdf-nngorlugu aasinnaavat.
Ukiortaami oqalugiat qanoq isumaqarfigaajuk?