Dronning Margrethe Nunatsinnukalerpoq

Ataqqinartorsuaq Dronningi oktobarip arfineq-pingajuaniit aqqaneq aappaata tungaanut Nunatsinniisaaq. Tamanna pivoq Naalakkersuisut siulittaasuata qaaqqusineratigut. Dronning Margrethep julimi tikeraartussaagaluarpoq covid-19-ilu pissutaallu tikeraarnissaralua kinguartinneqarpoq.

Dronning Margrethe Ilulissanut, Nuummut, Pituffimmut Station Nordimullu Nunatsinniinermini tikeraartussanngorpai.

- Qeqertarsuup Tunuani Ilulissaniinnermini Ilulissat Kangiata Illorsua, qanittukkut atoqqaartinneqartoq issittumilu pinngortitap pissusaanik siammarteriviusussaq, UNESCO-llu nunarsuarmiut eriagisassaattut allattorsimaffianut ilanngunneqarnikuusoq Dronningip ilaatigut pulaassavaa. Issittumi ilisimasassarsiortartoq atuakkiortorlu Knud Rasmussen 1921-mi Thulemut tallimassaanik ilisimasassiornermi siuttuusoq Ilulissani inunngorsimavortaaq. Ilisimasassarsiornerup tusaamasap ukiut 100-t matuma siorna pisimanera dronningimit malunnartinneqassaaq ilaatigut Knud Rasmussenip illoqarfik inunngorfigisimasaata Ilulissat tikeraarneratigut, Naalakkersuisut tusagassiutinut nalunaarumminni allapput.

Nerersuaqatigiineq biskopinngortitsinerlu

Nuummi nerersuartitsinissami Naalakkersuisut qaaqqusisuupput, Hans Egedep Oqaluffiani biskopinngortitsisoqalerapat Dronning aamma peqataasaaq. Kalaallit Nunaanni biskopeqarfimmi nutaatut Paneeraq Siegstad Munk biskopinngortinneqassaaq.

- Dronningip Kalaallit Nunaanut tikeraarnera nunatsinni kunngip siullerpaamik tikeraarneranit ukiut 100-nngornerani pisussanngorpoq. Danskit kunngeqarfiani kunnginit siullersaalluni Dronningip aataava Christian 10. nunatsinnut 1921-imi tikeraarpoq, ukiullu 100-nngornerat dronningip Nuummi tikerarnerani piffinni assigiinngitsuni malunnartinneqassalluni. Tamatuma saniatigut Hans Egedep Kalaallit Nunaanut tikinneranit ukiut 300-nngoraat Ilisimatusarfimmi aaqqissuussinermi malunnartinneqalerpat Dronningi peqataassaaq, Naalakkersuisut paasissutissiipput.

Ataqqinartosuup Dronningip tikeraarnera Kalaallit Nunaata avannaani, Pituffimmi Thule Air Basemi kiisalu Station Nordimi namminerisamik tikeraarnermi naggaserneqassapput.

Tusagassiuutit Dronningip Ilulissani Nuummilu tikeraarnera oktobarip 8-aniit 10-ata tungaanut malinnaaffigisinnaavaat. Avannaanilu angalanera malinnaaffigineqarsinnaasanngilaq. Dronningip angalanerani pilersaarutit kingusinnerusukkut avammut saqqummiunneqarumaartut, Naalakkersuisut tusagassiuutinut nalunaarumminni paasissutissiipput.

Powered by Labrador CMS