Dronit Kangerlussuarmiilissasut
Kangerlussuarmi Issittumi droneqarfiliorsinnaaneq pillugu politikerit suliffeqarfiillu januaarimi ataatsimeersuassapput. Suliffeqarfiillu arlallit Issittumi piginnaasanik annertusaanissamut droninik neqerooruteqartut aamma peqataassapput.
Issittumi droneqarfik siulleq Kangerlussuarmi inissisimassava?
Danskit pisortassarsiuussisarfiat Esbees 17. januaarimi Hotel Kangerlussuarmi ataatsimeersuarnissamut qaaqqusinerani, apeqqut taanna politikerit, oqartussat suliffeqarfiillu oqaluuserissavaat.
Droninik atuisarneq annertusiartuinnarpoq, Kalaallit Nunaallu pitsaasumik inissisimaffeqarpoq, Esbees tusagassiuutinut nalunaarummi taama allappoq. Droninik ingerlatsisartut pingasut, droninik nutaaliaasunik illersornissaqarfiup soqutigisaanik Kalaallit Nunaanni Danmarkimilu suliaqartussanut pisiniarfiusinnaasutut toqqarneqartut peqataasussaasut, tassani atuarneqarsinnaavoq.
Dronit Issittumi piginnaasanik annertusaanissamut Folketingip 2021-mi akuerisaanut ilaapput, droninik isorartuumut angalasinnaasunut Kalaallit Nunaata silaannartaanik nakkutilliinissamut atorneqartussanut aningaasanik immikkoortitsisoqarpoq.
Ataatsimeersuarnermut suliffeqarfinnik Israelimeersunik marlunnik aamma Amerikameersunik marlunnik peqataasoqassaaq, taakku tassunga atatillugu danskit illersornissaqarfianut droninik neqerooruteqassapput.
Kangerlussuarmi avatangiisit pitsaasut
Kalaallit Nunaata siunissami droninik nutaaliaasunik atuilernissaanut piareersarneqarnissaanut ataatsimeersuarneq tunngavoq, tassungalu atatillugu piginnaasanik siuarsaaluni ilinniartitsinerit aamma suliffeqarfinnik attassillunilu ineriartortinneqarnissaannut periarfissat.
- Kalaallit politikerii, oqartussaat aamma suliffeqarfiutaat droninut nutaaliaasunut ileqqumut nutaamut piareersarnissaat, Esbeesip soqutigisaraa. Kangerlussuarmi avatangiisit dronit ineriartortinnissaannut atulersinnissaallu annertuumik iluaqutissaqartitsipput, tassani Issittumi pissutsit sakkortuut suliaqarfiunissaannut ineriartortitsisoqarsinnaavoq, ilanngullugu tamanna oqaatigineqarpoq.
Suliffeqarfik suleqatigiinnernik, attaveqaqatigiinnermik aamma sulisussarsiornermik suliaqartuuvoq, piffissarlu ungasinnerusoq eqqarsaatigalugu droninut nakkutilliinermullu tunngatillugu suliassanut nutaanut sulisussanik pissarsititsisinnaavoq.
Qeqqata Kommuniani borgmesteri, Malik Berthelsen aamma Mittarfeqarfinni pisortap tullia Niels Grosen, peqataasunut ilaassapput.